Galiza Nova Cabanas

Día da Galiza Mártir en Ferrol

2010-08-16T20:27:00.002+02:00

Galiza Nova de Ferrolterra, en colaboración co Bloque Nacionalista Galego de Ferrol, levará a cabo unha homenaxe a todas as persoas asasinadas polo fascismo, coincidindo co Día da Galiza Mártir, que se celebra mañá, 17 de agosto.

O acto terá lugar no busto a Camilo Díaz Baliño, sito no Cantón de Molíns (Ferrol) ás 12.30h da mañá e contará coas intervencións de Iago Varela, Responsábel Comarcal de Galiza Nova e Xoan Xosé Pita, candidato do BNG á Alcaldía de Ferrol.

Concurso Pop - Rock Galiza Nova

2010-08-09T12:24:00.002+02:00

Galiza Nova de Narón está a organizar un concurso pop-rock para o vindeiro mes de setembro, para dar a coñecer grupos das comarcas de Ferrolterra, Eume e Ortegal.

Bases do concurso:

1. A Asociación Xuvenil Galiza Nova, co fin de apoiar, promover e difundir a creación musical en lingua galega convoca un concurso musical nos ámbitos de pop-rock, que se rexerá polas bases seguintes:

2. Poderán participar todos aqueles grupos que teñan o seu local de ensaio nas comarcas de Ferrol, Eume e Ortegal e como mínimo un dos membros do grupo estea censado nalgún dos concellos que integran estas 3 comarcas:

2.1.- Ferrolterra: Ferrol, Ares, Fene, Mugardos, Neda, Narón, Valdoviño, As Somozas, Moeche, San Sadurniño, Cedeira.

2.2.- Eume: Cabanas, A Capela, Monfero, Pontedeume, As Pontes.

2.3.- Ortegal: Cariño, Cerdido, Mañón, Ortigueira.

3. Non poderán participar aqueles grupos que na actualidade teñan un contrato discográfico en vigor.

4. A media de idade das formacións terá que estar comprendida entre os 16 e 35 anos, establecéndose os 16 anos como idade mínima.

5. Os grupos deberán interpretar temas propios nun tempo comprendido entre 15 e 30 minutos.

6. Para optar ao concurso, cada grupo deberá interpretar dous temas en lingua galega, que serán o principal criterio de valoración para optar aos premios.

7. Os temas en galego deben ser remitidos por escrito ao mesmo correo que se indica posteriormente para formalizar a inscrición, cando menos tres días antes da celebración do concurso.

8. A participación está limitada a un número máximo de 20. En caso de que este número sexa superado, crearase unha lista de espera por rigorosa orde de inscrición. Se a organización o estimase oportuno, poderase modificar o nº de prazas para garantir o bo desenvolvemento do concurso.

9. A organización asume a responsabilidade da admisión dos grupos que participarán no concurso e constituirá, mesmamente, o xurado que elixirá aos gañadores.

10. O xurado estará composto por membros da entidade organizadora e persoas relacionadas co mundo da música.

11. A data de para a celebración deste concurso é o sábado 25 de setembro a partir das 18h.

12. A orde de actuación dos distintos grupos será determinada pola organización.

13. Para formalizar a inscrición cada grupo deberá completar o formulario de inscrición proporcionado pola entidade organizadora e enviado ao seguinte correo electrónico narongalizanova@gmail.com.

14. Os premios consistirán en:

a. 1º clasificado: 1000 €. e a gravación dun videoclip.

b. 2º clasificado: 600 €

c. 3º clasificado: 400 €.

15. O xurado poderá declarar deserto calquera dos premios se o estimase oportuno.

16. O fallo do xurado será inapelábel e farase público ao remate do concurso.

17. Os participantes eximen á organización deste concurso de calquera responsabilidade derivada do plaxio ou de calquera transgresión da normativa vixente en materia de propiedade intelectual.

18. Os grupos participantes, na súa condición de autores e intérpretes, dan a súa autorización e ceden os seus dereitos para a utilización dos temas e do videoclip por parte da entidade organizadora, nunca tendo un uso comercial.

19. A participación neste concurso implica a aceptación da totalidade das bases por parte dos grupos participantes e das decisións da organización e do xurado mencionados, con renuncia expresa a todo recurso que se opoña a estas. Mesmamente, implica a íntegra aceptación das características do evento, da súa estrutura e da súa organización.

[Descarga]: Ficha de inscrición

[Descarga]: Bases

Festigal 2010

2010-07-22T10:48:00.002+02:00

Un ano máis, Galiza Nova e a Fundación Galiza Sempre organizan o Festigal cunha diversificada programación que abranguerá dende actividades lúdicas a concertos. Mira toda a programación na web www.festigal.com

Homenaxe a Rosalía de Castro e Castelao

2010-07-22T10:41:00.002+02:00

Galiza Nova organiza, seguindo a tradición iniciada coas Arengas da Mocidade, a Homenaxe a Rosalía de Castreo e Afonso Daniel Rodríguez Castelao.

O acto terá lugar o vindeiro 24 de xullo a partires das 17.30h no Panteón de Galegos Ilustres, en San Domingos de Bonaval. Este ano o acto cobra unha especial relevancia, pois cúmprese o 125 cabodano de Rosalía de Castro.

Durante eo evento leranse diferentes fragmentos da poetisa de Padrón e o rianxeiro, coa colaboración de María do Pilar García Negro, Guillerme Ignacio Costa, Comba Campoy, Uxío Novo Rei e Federico Pérez. Así mesmo, contaremos tamén coa actuación musical do Coro da Asociación musical Solfa, de Santiago de Compostela, e coas intervencións de Guillerme Vázquez, Voceiro nacional do BNG, e de Iria Aboi, Secretaria Xeral de Galiza Nova. Para rematar cantaremos o noso himno nacional co acompañamento de Iván Area á gaita. Agardámoste!!

Mobilízate o 17 de xuño! Contra o paro xuvenil, a precariedade e a reforma laboral!

2010-06-16T16:30:00.003+02:00

Tal e como fixemos o pasado 8 de xuño apoiando a folga no sector público contra o Plan de Axuste presentado polo goberno do Estado, co que se pretende recortar o déficit público a cambio de facer recaer as consecuencias da crise entre as maiorías sociais con medidas contraproducentes e inxustas, Galiza Nova estará presente nas mobilizacións convocadas pola CIG para o vindeiro xoves 17 de xuño nas diferentes cidades do país, saíndo a da nosa comarca da Avenida de Esteiro (local da CIG) (Ferrol) ás 20.00 horas.

Con esta convocatoria queremos amosar o noso rexeitamento ao decreto de reforma laboral presentado desde o goberno do Estado, que será refrendado polo Consello de Ministros do mércores 16 de xuño. Desde o goberno do Estado, ameázannos agora cunha nova reforma laboral regresiva que ten como eixos centrais o abaratamento do despido e a perda dos dereitos do conxunto das traballadoras e traballadores e, co aplauso da patronal, propóñense medidas como a ampliación dos 21 aos 24 anos os contratos de formación, condenando a milleiras de mozas e mozos a condicións de traballo de miseria, sen tan sequera garantías laborais, ao mesmo tempo que propoñen potenciar o papel das ETT's de xeito escandaloso, en detrimento dos servizos públicos de emprego.

Do mesmo xeito, o PSOE propón seguir coa política de bonificacións á contratación de xente nova, sen que se tiveran producido melloras no emprego xuvenil nos últimos anos e pola contra se desbaldiran millóns de cartos públicos.

Asi mesmo, na nosa nación o Partido Popular desde o goberno da Xunta de Galiza, está a aplicar as mesmas medidas de recortes impulsadas a nivel estatal, acompañándoas do desmantelamento dos servizos públicos como a sanidade, o ensino ou o Consorcio Galego de Igualdade e Benestar, dilapidando millóns de cartos públicos, e sen poñer en marcha nin unha soa medida a nivel laboral, en máis dun ano de goberno.

Desde Galiza Nova consideramos que o futuro de Galiza e da xente nova pasa por un cambio nas políticas sociais e económicas, de maneira que se aposte por un modelo produtivo que xere riqueza e emprego a partir da potencialidade da base produtiva e industrial de Galiza. Así, opoñémonos ás medidas de axuste e á reforma laboral propostas polo Goberno do Estado, que xogan en contra da clase traballadora.

Por todo isto estaremos na rúa apoiando as mobilizacións do sindicalismo nacionalista e apoiaremos a convocatoria dunha Folga Xeral en defensa do traballo digno e na Terra e contra as actuais medidas económicas! Súmate a nós!

Concentración de solidariedade con Palestina

2010-06-01T14:50:00.002+02:00

Galiza Nova condena o ataque israelí que tivo lugar a pasada madrugada contra os barcos dunha expedición humanitaria que levaba axuda á poboación palestina, rompendo o bloqueo do estado de Israel á franxa de Gaza. Este ataque, contra civís desarmados, no que máis unha vez o estado sionista de Israel vulnera o direito internacional e os direitos humanos tivo como resultado máis dunha ducia de vítimas mortais ademais de perto de 30 feridos.

Por iso, facemos un chamamento á mocidade galega a participar das concentracións que terán lugar este martes 1 de xuño nas diferentes cidades do país para defender unha vez máis o dereito do pobo palestino á súa soberanía e para demandar a actuación urxente da UE e da comunidade internacional para pór freo ás agresións do estado de Israel esixíndolle responsabilidades polos seus actos criminais. En Ferrol será ás 20.30h diante do Edificio da Xunta.

Ademais, á mesma hora terán lugar as concentracións de A Coruña (no Obelisco), Santiago de Compostela (Praza do Toural), Lugo (diante do Concello), Pontevedra (Praza da Peregrina) e Vigo (diante do Marco).

Mañá, todas/os a Compostela!

2010-05-16T08:51:00.002+02:00

Contra o paro xuvenil e a precariedade, traballo digno e na terra!

2010-04-28T19:23:00.002+02:00

Desde Galiza Nova, consideramos preocupante a situación laboral da mocidade en Galiza, caracterizada polas elevadas taxas de paro e precariedade laboral que se teñen elevado nos últimos meses a consecuencia da actual crise económica.

Segundo a enquisa de poboación activa do terceiro trimestre do 2009, na Galiza temos unha taxa de paro do 43.7% entre a mocidade de 16 a 19 anos, que triplica a dos maiores de 25 anos. O que indica que é precisamente a mocidade o colectivo que primeiro, e con maior intensidade, padece os efectos da crise. A isto hai que sumarlle as condicións de precariedade daquelas mozas e mozos empregados (temporalidade, baixos salarios...) ou a daquelas/es que tiveron e teñen que emigrar cada ano para acceder a un posto de traballo fóra da nosa nación, Galiza.

Esta problemática estrutural, produto do actual sistema económico capitalista e da situación de dependencia que sofre Galiza, vese agravada no actual contexto de crise económica, cunhas consecuencias, que ademais de afectar ao conxunto da clase traballadora, están golpeando de xeito especialmente duro á mocidade: co incremento do paro, expedientes de regulación de emprego (ERE), propostas por parte da patronal para a reforma laboral destinadas ao abaratamento do despido e perda de dereitos. Con esta situación o futuro para a mocidade galega é incerto non só dende o punto de vista individual senón colectivo.

Mentres, o Psoe no goberno do Estado, ameázanos cunha nova reforma laboral que propón ampliar dos 21 aos 24 anos os contratos de formación, condenando a milleiras de mozas e mozos a condicións de traballo de miseria, sen tan sequera garantías laborais, ao mesmo tempo que propoñen potenciar o papel das ETT´s de xeito escandaloso, en detrimento dos servizos públicos de emprego. Do mesmo xeito o Psoe propón seguir coa política de bonificacións á contratación de xente nova, sen que se tiveran producido melloras no emprego xuvenil nos últimos anos e pola contra se tivesen despilfarrado millóns de cartos públicos.

Medidas que o único que perseguen é facer recaer as consecuencias da crise sobre as clases populares.Así mesmo, o Partido Popular na Xunta de Galiza, mira para outro lado e preocúpase de maquillar os datos sen poñer en marcha nin unha soa medida a nivel laboral para a mocidade neste ano de goberno.

Dende Galiza Nova, organización xuvenil do BNG, consideramos vital para Galiza e o futuro da xente nova, un cambio de rumbo nas actuais políticas sociais e económicas. Por iso aproveitamos todos os días do ano, pero especialmente o 1º de maio, día Internacional da clase traballadora, para reivindicar unhas condicións de traballo dignas ao igual que outras traballadoras traballadores en todo o mundo. Loitas que aquí na Galiza teñen nomes e apelidos: Tréves, Caramelo, Montoto, Metal, Alfageme,...e que son un exemplo de dignidade e compromiso para nós. Súmate a nós contra o paro xuvenil e a precariedade.

Loita por un traballo digno e na Terra!.

Acude á manifestación que terá lugar en Ferrol o 1 de maio. Sairá ás 12h do local da CIG (Avda. Esteiro).

Por un Eume sen peaxe!

2010-04-28T19:18:00.002+02:00

O BNG de Cabanas, xunto co de Pontedeume, convoca para o vindeiro venres 30 de abril ás 20h unha concentración na rotonda de Cabanas, co obxetivo de reclamar a fin dos problemas de tráfico que caracterizan á ponte do Eume.

O BNG está a traballar arreo para que o Ministerio de Fomento retome a viablidade do enlace coa AP-9 en Vidreiro, o que daría unha solución definitiva ás retencións diarias de tráfico entre as dúas vilas eumesas.

Acude!

Galiza Nova chama á mobilización masiva na defensa do naval

2010-03-25T10:25:00.001+01:00

· A organización xuvenil do BNG amosou nun comunicado o seu 'apoio total' á mobilización convocada pola Plataforma Rumbo21

· A Dirección Nacional de Galiza Nova arroupará á comarca de Ferrolterra

Galiza Nova, organización das mocidades do BNG, vén de manifestar o seu apoio 'total e sen condicionantes' á mobilización convocada polo Plataforma Rumbo21.

'O sector naval é un dos focos máis importantes da nosa actividade industrial e unha peza clave no desenvolvemento social e económico da comarca de Ferrolterra' sinalou Iago Varela, Responsábel Comarcal de Galiza Nova. “Por iso, esiximos a volta á construción naval de Astano, para que as súas instalacións sirvan para construír, transformar e reparar barcos' engadiu.

Dende a organización nacionalista lembran que 'a defensa do naval é unha reivindicación histórica de Galiza Nova nesta comarca', polo que esta semana están a desenvolver unha intensa campaña informando sobre o seu posicionamento e repartindo pegatinas co lema “Ferrolterra ZP: Zona Puteada. Defendamos o sector naval'.

'Facemos un chamamento á mocidade da comarca a participar masivamente na manifestación do sábado', concluíu Iago Varela, quen lembrou a participación no acto da Dirección Nacional de Galiza Nova, encabezada pola Secretaria Xeral, Iria Aboi.

Concentración de urxencia: luns 15 de marzo

2010-03-14T15:59:00.004+01:00

Ante a presentación do novo Decreto que o goberno do Partido Popular na Xunta de Galiza quere impór, eliminando o anterior Decreto aprobado polo bipartito, dende Galiza Nova chamamos a toda a mocidade a participar da concentración que terá lugar mañá luns 15 de marzo ás 20.00h diante do edificio da Xunta de Galiza, en Ferrol

Galiza Nova participou onte da pegada de Queremos Galego en Ferrol

2010-01-17T12:02:00.004+01:00

Galiza Nova participou onte diante do edificio administrativo da Xunta de Galiza en Ferrol dunha pegada conxunta das diferentes organizacións xuvenís e estudantís que formamos parte da Plataforma Queremos Galego. O obxetivo deste acto foi animar á sociedade en xeral e nomeadamente ao estudantado, a secundar a folga prevista para o vindeiro xoves 21 de xaneiro.

"Estamos hoxe aquí organizacións diversas no ideolóxico, mais unidas por unha causa común: a defensa do galego fronte aos ataques que está a sufrir do PP ao fronte da Xunta de Galiza".

Entre os participantes, estiveron presentes Iago Varela, Responsábel Comarcal de Galiza Nova, Alberto García, Responsábel Local de Galiza Nova en Fene, Mateo Verdeal, Responsábel dos Comités en Ferrol, Xiana Rico, Responsábel da Mocidade pola Normalización Lingüística, Carlos Outeiro, Voceiro da Plataforma Queremos Galego na comarca e Julian Reina, Secretario Xeral das Xuventudes Socialistas de Ferrol.

Ademais, Galiza Nova distribuiu material da campaña propia "Nas aulas da Galiza, queremos galego" por diferentes centros de ensino da comarca e despregou varias faixas animando ao estudantado a participar da manifestación que terá lugar en Compostela o 21 de xaneiro ás 11.30h.

Galiza Nova participará nun debate sobre o borrador do Decreto en Ferrol

2010-01-17T01:00:00.003+01:00

Galiza Nova participará este martes 19 de xaneiro ás 16.15h nun debate no IES Concepción Arenal de Ferrol sobre o borrador do novo Decreto do ensino.

Este borrador, presentado polo goberno de Núñez Feijóo o pasado 30 de decembro, pretende reducir a presenza do galego no ensino, escenificando o maior retroceso de toda a democracia no que ten a ver coa normalización da nosa lingua.

Marcos Loureiro, Vicerresponsábel Comarcal de Galiza Nova, debatirá con María Torres, Secretaria Xeral de Xuventudes Socialistas e Javier Acosta, Presidente de Novas Xeracións de Narón

Pegada de cartaces diante da Xunta

2010-01-16T08:26:00.002+01:00

Hoxe, sábado 16 de xaneiro ás 17h, está previsto unha pegada de carteis da Plataforma Queremos Galego chamando á folga diante do edificio da Xunta de Galiza de Ferrol.

No acto participarán Iago Varela, Responsábel Comarcal de Galiza Nova, Mateo Verdeal, Responsábel dos Comités en Ferrol, Xiana Rico, Responsábel da Mocidade pola Normalización Lingüística, Carlos Outeiro, Voceiro da Plataforma Queremos Galego e Julián Reina, Secretario Xeral de Xuventudes Socialistas en Ferrol.

Nas aulas da Galiza, queremos galego!

2010-01-14T16:31:00.006+01:00

Baixo o lema Nas aulas de Galiza, queremos galego, Galiza Nova está a distribuír material por toda a comarca e nomeadamente no Concello de Cabanas chamando á folga no ensino convocada para o vindeiro xoves 21 de xaneiro pola Plataforma Queremos Galego.

O propio día 21 está convocada unha manifestación nacional na defesa da lingua e contra o decretazo do PP. Será ás 11.30h da mañá e partirá da Alameda de Compostela.

Haberá autobuses dende a comarca para asistir ao acto en Santiago. Haberá un que sairá dende o Teatro Jofre de Ferrol ás 10h (chamar ao 981.358.750) e outro que cubrirá a zona As Pontes-Cabanas-Pontedeume (chamar ao 981.451.510).

Novos blogues locais

2010-01-04T19:18:00.005+01:00

As compañeiras e compañeiros de Galiza Nova nas localidades de Valdoviño e Ferrol veñen de pór en marcha sendos blogues nas que nos manterán informados de todo o que ten a ver coa nosa organización en ditos concellos.

Podes visitalos nos seguintes enderezos:

- http://galizanovaferrol.blogspot.com
- http://galizanovavaldovinho.blogspot.com

Galiza Nova participou hoxe do envío de postais a Feijóo

2009-12-29T15:50:00.002+01:00

Galiza Nova participou hoxe no envío masivo de postais ao presidente da Xunta de Galiza, Alberto Núñez Feijóo, nun acto convocado pola plataforma Queremos Galego.

Fran Rei e Carlos Outeiro, voceiros da Plataforma, fixeron entrega das máis de 700 postais reivindicativas na oficina central de Correos.

Galiza Nova participará mañá ademais na concentración que terá lugar ás 17.00h na Praza do Obradoiro.

De Eventos Galiza Nova

Concentración en Ferrol e acto nacional en Compostela

2009-12-28T20:05:00.002+01:00

Ante a posibilidade de que o goberno da Xunta de Galiza faga efectiva a súa intención de derrogar o Decreto 124/2007 nesta mesma semana, dende a Plataforma Queremos Galego, da que Galiza Nova forma parte, levaranse a cabo varias accións.

A primeira delas terá lugar mañá martes 29 de decembro ás 11.00h diante da oficina de Correos de Ferrol e consistirá nunha concentración previa ao envío masivo das postais de Nadal reivindicativas. O acto contará coa presenza de Fran Rei, Voceiro Nacional da Plataforma.

Ademais, e neste mesmo sentido, convócase para o mércores 30 ás 17.00h unha concentración nacional na Praza do Obradoiro de Compostela.

Acude!

A nosa nación, a nosa selección!

2009-12-24T20:11:00.003+01:00

Baixo o lema "A nosa nación, a nosa selección", dende Galiza Nova pomos en marcha unha nova campaña coa que pretendemos reivindicar a oficialidade para as nosas seleccións deportivas ante a supresión dos partidos da seleccións galegas por parte do goberno do PP na Xunta de Galiza.

Temos claro que esta medida responde a unha estratexia do PP de anular politicamente á nosa nación en todos os ámbitos, ben sexa no lingüístico, o cultural ou o deportivo.

Antes esta medida, Galiza Nova participará na concentración convocada polo BNG o vindeiro luns 28 de decembro ás 12.00h na Praza do Obradoiro de Santiago de Compostela. Non faltes! E se tes camisola da selección, lévaa contigo!

Para máis información sobre este acto podes dirixirte a nós en galizanovacabanas@gmail.com

[Descarga]: Panfleto da campaña

A nosa lingua, a nosa nación, autodeterminación!

2009-12-05T11:05:00.003+01:00

Alfonso Daniel R. Castelao afirmaba na súa obra Sempre en Galiza que: “unha nación é unha comunidade estábel, historicamente formada de idioma, de territorio, de vida económica e de hábitos psicolóxicos reflexados nunha comunidade de cultura. Somentes a existencia de todos estes signos distintivos, en conxunto, pode formar a nación”.

É evidente que Galiza é unha nación, mais que non conta con dereitos políticos para poder decidir libremente o seu futuro. O marco constitucional e autonómico vixente nega os nosos dereitos colectivos. Isto impide que poidamos artellar políticas propias a nivel económico na defensa dos nosos sectores produtivos, no desenvolvemento dun marco galego de relacións laborais, no ordenamento e protección do noso medio natural, no impulso das seleccións deportivas propias ou no desenvolvemento da nosa lingua e cultura con normalidade no noso propio territorio.

Hoxe, como vén facendo o nacionalismo galego durante toda a súa historia, opoñémonos á Constitución española porque nega a existencia da nación galega e o dereito de autodeterminación, imprescindíbel para o desenvolvemento do noso futuro e para non estar sometidos á presión ou ás inxerencias alleas á propia vontade das galegas e galegos.

As mozas e mozos galegos non imos celebrar unha Constitución sacralizada polo PP e polo PSOE que, despois de máis de 30 anos, só serve para agravar os nosos problemas: desmantela as bases da nosa economía, provoca uns niveis de paro e precariedade escandalosos entre a xente nova, favorece a destrución dos nosos recursos naturais ou deteriora o ensino público.

Non imos celebrar unha Constitución que lles atribúe ás forzas armadas “a misión de defender a integridade territorial de España”. Non imos celebrar unha Constitución que nos priva de liberdade e dos nosos dereitos democráticos máis elementais, como o dereito a vivirmos en galego. No Estado español non todas e todos somos iguais, nin tampouco todas as linguas e culturas gozan dos mesmos dereitos. Só hai unha lingua, o español, que todas as cidadás e todos os cidadáns “teñen o deber de coñecer e o dereito de usar”.

A nosa lingua propia, o galego, non conta con este recoñecemento e padece unha discriminación a nivel social e xurídico evidente. Os ataques que a lingua galega está a sufrir por parte do Partido Popular na Xunta de Galiza veñen amparados por esta desigualdade xurídica da nosa lingua e favorecen a situación de racismo lingüístico que se vive na Galiza. A modificación da Lei de función pública, o uso deturpado da nosa toponimia ou a derrogación do Decreto 124/07 no ensino son algunhas das consecuencias desta desigualdade legal do galego fronte ao español.

Desde Galiza Nova, organización xuvenil do BNG, somos conscientes de que en Galiza non estamos de aniversario e de que só avanzaremos nos nosos dereitos coa mobilización e a implicación de todas e todos. A defensa da lingua galega significa a defensa de Galiza como nación e, por iso, nas vindeiras semanas as mozas e mozos sairemos á rúa en contra do Partido Popular e das políticas que buscan a eliminación da nosa lingua propia. Así que súmate á defensa da nosa lingua, súmate á defensa de Galiza!

Galiza Nova participa activamente da Plataforma a prol do ferrocarril na comarca

2009-11-15T20:04:00.002+01:00

Galiza Nova vén de participar na constitucón da Plataforma a prol da modernización da infraestrutura e dos servizos ferroviarios, xurdida na nosa comarca para dar resposta ao desleixo do goberno español en materia ferroviaria.

A táboa reivindicativa inicial incluía as esixencias ao Ministerio de Fomento de executar as obras de duplicación da vía entre a Ponte das Cabras e a estación de Ferrol (xa comprometidas nos orzamentos deste ano) a licitación do tramo Ferrol-Betanzos, a reclamación do by pass para salvar a estación de Betanzos-Infesta ou os accesos ao porto interior e ao polígono do Río do Pozo, entre outras cuestións.

Dende Galiza Nova solicitamos a potenciación de novos servizos Ferrol-Santiago, nomeadamente nas fins de semana, cando hai máis movemento de estudantado, así como tamén a implantación do billete único tren/bus, o aumento das frecuencias Ferrol-A Coruña, o mantemento das paradas actuais en núcleos pequenos e a adecuación do tipo de tren ás horas de maior demanda.

Estas demandas non son novas para a nosa organización. O 26 de marzo de 2008 aprobábase por unanimidade no Concello de Cabanas unha moción que instaba a Xunta de Galiza a mellorar o transporte no concello.

Galiza Nova QUERE GALEGO!

2009-10-14T10:55:00.002+02:00

Galiza Nova de Cabanas, como non podería ser doutro xeito, participará o vindeiro domingo 18na manifestación que convoca a plataforma Queremos Galego en Santiago de Compostela.

Para facilitar a asistencia á mesma, haberá autobuses cara Santiago, que podes consultar clicando aquí.

Alén da manifestación, dende Queremos Galego proponse a seguinte Iniciativa Lexislativa Popular, que podes apoiar aquí:

Proposta de Iniciativa Lexislativa Popular

pola Garantía dos Dereitos Lingüísticos

EXPOSICIÓN DE MOTIVOS

O Estatuto de autonomía de Galicia estabelece no seu artigo 5.º que “a lingua propia de Galicia é o galego” e que “os idiomas galego e castelán son oficiais de Galicia e todos teñen o dereito de os coñecer e de os usar”. Para facer efectivos estes dereitos a lei sinala que “os poderes públicos de Galicia garantirán o uso normal e oficial dos dous idiomas e potenciarán o emprego do galego en todos os planos da vida pública, cultural e informativa, e disporán os medios necesarios para facilitar o seu coñecemento”, acadando así que ninguén sexa “discriminado por causa da lingua”.

A pesar do sinalado nesta norma, a realidade é que a lingua propia do país continúa sen ter garantida a presenza mínima do seu recoñecemento de oficialidade hai tres décadas, situándose a súa posición pública e institucional lonxe do mandado estatutario. Así, está ausente de boa parte da documentación e sinalizacións públicas, o dereito a recibir atención neste idioma carece de garantías reais e o sistema educativo non só non garante as competencias lingüísticas suficientes en galego, senón que incide no abandono do galego por parte de moitas nenas e moitos nenos.

Para rematar con este incumprimento estatutario é necesario que o Goberno galego adopte medidas para romper con esta situación tan inxusta e avanzar na normalización. As galegas e os galegos teñen que ter garantido o dereito a poderen vivir con normalidade na súa lingua na súa terra, sen discriminacións de ningún tipo, como prevé o Estatuto de autonomía no art. 5.

A liberdade das persoas que integran a sociedade galega só poderá ser efectiva cando o Poder Público dispoña os medios no sistema educativo para que todos e todas coñezan axeitadamente o galego e a Administración estea en condicións de dispensar os seus servizos na nosa lingua.

A Administración debe cumprir ademais o deber de fomento do uso do galego na vida pública para que mediante a súa visualización a lingua propia acceda a ámbitos institucionais e privados dos que tradicionalmente estivo excluída, transmitindo a mensaxe á sociedade de que a nosa lingua é válida para calquera situación da vida diaria. Cúmprese así co deber constitucional previsto no art. 9.2. da Constitución española de crear as condicións para facer efectiva a igualdade das persoas, promovendo a lingua que está en condicións de desvantaxe social –como amosa a evolución dos Mapas sociolingüísticos elaborados pola Real Academia Galega–, fundamento das leis protectoras e fomentadoras do galego.

Estas medidas teñen que ir no camiño dos consensos acadados nestes anos, como a aprobación en 1996 da Declaración universal de dereitos lingüísticos, a ratificación en 2001 da Carta europea das linguas rexionais ou minoritarias, monitorizada polo Consello de Europa, e a aprobación en 2004 do Plan xeral de normalización da lingua galega.

TÍTULO ÚNICO

Artigo 1.- O Goberno galego, en cumprimento da obriga estabelecida no artigo 5 do Estatuto de Autonomía, fará plenamente efectivos os dereitos das galegas e dos galegos a utilizaren o idioma propio do país.

Artigo 2.- O Goberno galego garantirá que toda a sinaléctica, información e documentación administrativa que reciban os cidadáns e as cidadás en todos os ámbitos administrativos da Xunta, ou en calquera ámbito participado por ela, incluídas todas aquelas entidades xurídicas que prestan servizos dependentes daquela, estean en galego.

Artigo 3.- O Goberno galego garantirá que todos os seus servizos, e os de calquera entidade participada por el, incluídas todas aquelas que os prestan dependendo da Xunta, serán prestados en galego a todos os cidadáns e cidadás. O persoal das entidades dependentes da Xunta ha tomar a iniciativa dirixíndose e manténdose en galego cara ao público, coa excepción daquelas ou daqueles que soliciten seren atendidos en castelán. Así mesmo, todos os cargos públicos e os dos organismos e entes autonómicos, sociedades públicas e institucións dela dependentes farán uso público, tanto oral como escrito, de xeito sistemático, da lingua galega no desempeño da súa responsabilidade.

Artigo 4.- O Goberno galego garantirá que o dereito a usar e recibir información, documentación etc na lingua propia do país non supoña ningún tipo de discriminación, demora na prestación do servizo ou deturpación lingüística por parte da Administración galega ou os seus representantes.

Artigo 5.- O Goberno galego adoptará as medidas necesarias para garantir o dereito a recibir o ensino en galego por parte de todo o alumnado ao menos nun 50% do horario escolar en cada curso en todas as etapas educativas, de acordo co sinalado no Plan xeral de normalización da lingua galega.

Disposición Transitoria.- O Goberno galego deberá adoptar cantas medidas sexan precisas para lle dar cumprimento ao disposto nos artigos 2 e 3 nun prazo de seis meses desde a entrada en vigor desta lei.

Disposición Final.- A presente lei entrará en vigor ao día seguinte da súa publicación no Diario Oficial de Galicia.

Intervencións políticas no Día da Galiza Mártir

2009-08-16T13:12:00.002+02:00

O pasado venres tivo lugar en Narón a homenaxe organizada por Galiza Nova para conmemorar o Día da Galiza Mártir.

Velahí as intervencións políticas:

Iago Varela, Responsábel Comarcal de Galiza Nova

Francisco Rodríguez, membro da Executiva Nacional do BNG

Día da Galiza Mártir en Ferrolterra

2009-08-13T10:56:00.004+02:00

Galiza Nova ten previsto un acto para mañá, venres 14 de agosto, ás 19.00h na rúa Alexandre Bóveda de Narón, para conmemorar o Día da Galiza Mártir.

O acto contará coas intervencións políticas de Iago Varela, Responsábel Comarcal de Galiza Nova e Francisco Rodríguez, Membro da Executiva Nacional do BNG.

Ademais, o poeta Henrique Rabuñal fará lectura duns versos e haberá unha ofrenda floral.

Ao remate do acto cantarase o himno galego acompañados de Manolo Doval.

Agardamos contar coa túa presenza!!

Como chegar:

Visualizar o mapa ampliado

Galiza Nova homenaxea a Rosalía e Castelao

2009-07-23T11:44:00.005+02:00

Como vén sendo habitual, Galiza Nova celebrará o vindeiro 24 de xullo ás 17.30h no Panteón dos Galegos Ilustres de San Domingos de Bonaval (Compostela) unha homenaxe a Rosalía e Castelao.

Para lembralos, no acto leranse fragmentos das súa obra por parte de Anxo Angueira (profesor de lingua e literatura e escritor) Paula Carballeira (actriz), Carlos Blanco (actor) e Guadi Galego (artista e profesora da Central Folque).

Así mesmo tamén actuará o músico Miro Casabella e intervirán Iria Aboi, Secretaria Xeral de Galiza Nova, e de Guillerme Vázquez, Portavoz Nacional do BNG.

Para rematar cantaremos o himno nacional acompañados de Iván Area e Pablo Carpintero.

Contamos coa túa asistencia!

Galiza Nova presenta ao novo responsábel local de Fene e as actividades do Festigal

2009-07-13T14:54:00.002+02:00

Galiza Nova, a organización xuvenil do BNG, presentou hoxe en rolda de prensa ao novo Responsábel Local de Galiza Nova en Fene, Alberto García, que estivo acompañado polo Responsábel Comarcal da organización, Iago Varela.

Na súa intervención, Alberto García fixo fincapé nos retos que Galiza Nova ten por diante no concello fenés, onde “non se está a dar unha resposta acaída ás necesidades da mocidade”. Segundo amosou o novo Responsábel Local, unha das primeiras demandas da organización xuvenil do BNG nesa localidade irá nese sentido, se ben precisou que tamén levarán a cabo actos lúdicos, como un concerto con bandas noveis.

“Estamos a cumprir as nosas espectativas de espallamento por toda a comarca” indicou Iago Varela, que se amosou satisfeito, xa que segundo afirmou “nos concellos onde Galiza Nova ten presenza, estase a defender á mocidade”.

Festigal

O Responsábel Comarcal, Iago Varela, tamén deu conta das actividades que se levarán a cabo no Festigal, o evento co que Galiza Nova celebra en Santiago o Día da Patria, entre as que destacan os concertos de varios grupos, os debates e as presentacións de libros.

“O Festigal segue a ser un referente da cultura galega e en galego” afirmou Varela, quen convidou a toda a mocidade da comarca a asistir

Xa está aquí o Festigal 09!

2009-07-07T12:07:00.003+02:00

Un ano máis, os vindeiros 24 e 25 de xullo Compostela será o cenario dunha nova edición do Festigal, organizado por Galiza Nova e a Fundación Galiza Sempre.

O Campus Sul da Universidade de Santiago será onde acampe o Festigal, que contará cunha zona de concertos, feira de asociacións, tendas, galerías artesanais, zona de xantar... e moito máis!

Entre as actuacións musicais, haberá dous concertos:

O 24 de xullo ás 23.00h actuarán Chámalle Xis (Galiza), Os John Deeres (Galiza), Som do Galpom (Galiza) e DJ Click Live (Franza).

O 25 de xullo a troula comezará a partires das 22.00h, coas actuacións de Descarga ao Vivo (Cuba/Galiza), Katembe Project (Angola), Os tres trebóns e amighos, a grande treboada (Galiza).

[Multimedia]: Vídeos musicais dos participantes nos concertos.

Chámalle Xis

Os John Deeres

Som do Galpom

DJ Click Live

Descarga ao Vivo

Os tres trebóns e amighos, a grande treboada

Alén das actuacións musicais...

Galería das Ideas: debates sobre O FUTURO DA MÚSICA GALEGA, a CRISE ECONÓMICA, o DEREITO AO ABORTO e A LINGUA GALEGA.

Galería das Letras:

Librarías e editoriais: Andel do Libro (Vigo), A palabra Perduda (Santiago), Pedreira (Santiago), OQO, Rinoceronte, Urco, A Nosa Terra, Galaxia.

Sinatura de libros e presentacións, entre outros:

"O natural e o político, de Teresa Moure.
"Nos camiños do entusiasmo", de Goretti Sanmartín.
"Una monarquía protegida por la censura", de Iñaki Anasagasti".
"A cociña de larpeiros", de Benigno Campos.
"Piñeiro contra Castelao, Castelao contra Piñeiro", de X. C. Garrido.
"Sobre o racismo lingüístico", da editorial Laiovento.
"O regreso de Ramón Lamote". Conversa con Paco Martin, Víctor F. Freixanes, Xosé A. Neira cruz e Xavier Senín.

Exposicións

"Crónicas da represión lingüística" Mostra gráfica e audiovisual de Xan Leira.

Galería audiovisual: programación continua de curtametraxes e documentais.

Galería do Software Libre

Galería da cultura tradicional

Galería infantil /espazo de animación

Galería artesanal

Feira de asociacións: postos con material de asociacións, ONGs e colectivos diversos.

Tendas

Zona de acampada de balde

Zona de xantar

[Máis información]: Festigal

Consulta da Xunta de Galiza sobre o galego no ensino

2009-06-10T09:54:00.001+02:00

O venres 5 de Xuño, a Xunta de Galiza presentou a enquisa que se vai remitir ás familias dos 350.000 alumnos e alumnas escolarizados en Galiza nos niveis de educación infantil, primaria, secundaria e formación profesional e que en teoría ten como propósito inquirir a pais e nais sobre en que lingua prefiren que lles sexa impartido o ensino aos seus fillos e fillas.

Estudado o contido desta enquisa e analizadas as motivacións que levan ao Goberno galego a elaborala, o BNG ten que facer as seguintes valoracións:

1.- Estamos perante unha auténtica “consulta trampa”, inaceptábel quer na forma quer no fondo. Con ela non se pretende máis que dotar ao Goberno dunha coartada para xustificar unha política tracexada xa de antemán: o resultado do inquérito está predeterminado e terá como desenlace a derrogación do decreto sobre o uso do galego do ensino. O PP decidiu no seu día afastarse do consenso sobre o galego (Plano Galego de Normalización Lingüística, aprobado por unanimidade polo Parlamento Galego en 2004). Anunciou en campaña a derrogación do decreto e xa no goberno reiterou esa intención. A enquisa tenta lexitimar cun suposto manto de apoio social unha decisión de carácter político tomada antes de chegar ao Goberno e adoptada co único propósito de contentar os sectores máis extremistas do electorado do Partido Popular.

2.- A consulta, que é de carácter voluntario, carece da menor fiabilidade, tanto por como están enunciadas as preguntas como polo feito de que será a Administración, controlada politicamente polo Partido Popular, quen custodie todo o proceso de recolla dos datos. Non existen suficientes garantías de que os resultados non poden ser mesmo manipulados se non fosen do agrado do partido no goberno.

3.- Coa enquisa vaise criar unha tensión innecesaria nos centros de ensino e na propia sociedade galega, innecesaria porque, sexa cal for o resultado do inquérito, o Goberno xa ten anunciado que vai derrogar o decreto nun sentido claramente contrario ao uso da lingua galega no ensino.

4.- Tal e como están enunciadas as preguntas da consulta, todo o máis que poderían demandar os sectores favorábeis ao galego no ensino sería que se mantivese o galego como lingua na que se imparten as materias troncais. En ningún caso se pregunta ás familias se serían partidarias de que o conxunto das materias, e non só as troncais, se impartisen en galego.

Isto significa que coa enquisa os sectores favorábeis á españolización do ensino si poden conseguir avances a respecto da situación actual -reducir a presenza do galego nas troncais-, mentres que aqueles que son partidarios de avanzar na galeguización só poden aspirar a que, como moito, se manteña o actual statu quo, que vén consagrado precisamente polo decreto que o Goberno anunciou que vai derrogar.

5.- O mesmo Goberno que fai proclamas populistas e demagóxicas en favor da austeridade e o control do gasto público vai dilapidar 200.000 euros na realización desta “consulta trampa”, un dispendio impresentábel no actual contexto de precariedade de medios humanos e materiais que caracteriza a situación do ensino público en Galiza.

6.- Por termos en conta as consideracións anteriores, propoñemos marcar a opción “galego” (en Infantil e FP) e “todo en galego” (en Primaria e Secundaria), porque desta maneira estariamos a indicar que queremos en galego as materias que hoxe se deben impartir na nosa lingua, tal e como indica o decreto en vigor. Non significaría, por tanto, que optemos por todo o ensino en galego, pois esta opción non se considera.

7.- Igualmente xulgamos preciso transmitir a nais e pais a necesidade de incluíren no apartado de observacións da enquisa peticións semellantes ás que expresamos a continuación:

1.-Desexaría que o ensino fose en galego, unha opción que non recolle esta enquisa.

2.-Estou a favor da aplicación do decreto actual de promoción e uso do galego no ensino, realizado co consenso da comunidade educativa e que emana do Plan Xeral de Normalización da Lingua Galega, aprobado por unanimidade no Parlamento Galego.

3.-Todo o anterior fai que os resultados desta consulta non me parezan lexítimos.

Galiza Nova chama á mocidade da comarca a votar “masivamente” ao BNG

2009-06-01T12:49:00.002+02:00

Galiza Nova, a organización xuvenil do BNG, fixo hoxe un chamamento a toda a mocidade da comarca para que acudan ás urnas o próximo domingo a votar polo BNG por ser "a única alternativa para que Galiza conte en Europa".

Iago Varela, Responsábel Comarcal de Galiza Nova explicou que "o tempo deu á razón ao nacionalismo galego, que dende sempre criticou o fracaso do actual modelo económico e social da Unión Europea".

Neste sentido, dende Galiza Nova cren que é preciso apostar por políticas que non degraden as condicións laborais das traballadoras e traballadores e que defendan os servizos públicos, como o ensino ou a sanidade.

En palabras do Responsábel Comarcal, "O BNG traballará a prol dunha política antagónica á mercantilización e elitización da universidade pública que supón a implantación do Plan Boloña, así como tamén para que os nosos estaleiros volvan construír barcos".

"A única alternativa para avanzar en dereitos e na creación dun novo modelo social e económico alternativo ao neoliberal é a lista encabezada por Ana Miranda", sentencia Varela.

Para que Galiza conte, para que a mocidade conte! Vota BNG

2009-05-30T11:17:00.001+02:00

O próximo 7 de Xuño celébranse unhas eleccións moi importantes para o futuro das galegas e galegos.

As eleccións europeas determinan as políticas que se van a aplicar en nacións como Galiza e que teñen consecuencias visíbeis na nosa vida diaria. A partir das eleccións de 2004, o BNG non tivo presenza a nivel europeo e Galiza deixou de estar representada directamente nas institucións europeas.

Agora temos a oportunidade de ter voz e voto en Europa a través do BNG porque só así garantimos a defensa dos intereses de Galiza e a aposta por unha Europa dos pobos, social e democrática.

POR UNHA EUROPA DOS POBOS, GALIZA UNHA NACIÓN EUROPEA.

O nacionalismo galego defede o pleno recoñecimento de Galiza como nación nun Estado Español plurinacional, pluricultural e plurilingüe e aposta tamén no seo da UE, polo recoñecemento da identidade política, cultural e lingüística do noso país, así como das outras nacións e pobos de Europa.

O modelo de construción europea ten servido para ignorar as nacións sen Estado como a nosa e para impedirnos o desenvolvimento das nosas potencialidades, respondendo unicamente aos dictames do capital transnacional a través dos grandes Estados europeos.

Despois do fracaso do Tratado Constitucional (co “non” de Francia e Holanda) e da súa nova versión co tratado de Lisboa (rexeitado por Irlanda) é necesario un modelo alternativo como o que defende o BNG. Un modelo democrático que aposte polo recoñecemento de todas as nacións e pobos de Europa en pé de igualdade, así como das culturas e linguas que como o galego aínda non teñen o recoñecemento oficial no seo da UE.

Só a través da participación de Galiza con voz propia e voto en Europa nos foros onde se traten as cuestións que nos afectan directamente, conseguiremos que Galiza conte e que os intereses e necesidades das galegas e galegos, especialmente as e os máis novos, estean defendidos.

O NACIONALISMO ALTERNATIVA AO MODELO ECONÓMICO NEOLIBERAL DA CRISE E DE BOLOÑA.

O nacionalismo galego sempre se manifestou contrario ao modelo económico e social da Unión Europea. Este modelo neoliberal sistemáticamente negou as nosas capacidades productivas, desmantelou os servizos públicos básicos e afondou na desregularización e a perda de dereitos das traballadoras e traballadores, especialmente na mocidade sufrindo hoxe as maiores taxas de precariedade, de baixos salarios e de paro en Galiza.

Para o BNG a crise económica que padecemos é consecuencia deste modelo tan negativo e por iso cremos que son necesarias políticas que non degraden as condicións laborais (como o intento de aprobar a Directiva do tempo de Traballo que pretendía ampliar a xornada laboral ás 65h semanais) así como políticas que defendan servizos públicos tan elementais como o ensino.

Nese sentido o BNG pulará por unha política univesitaria baseada na consideración da universidade como un servizo público e no dereito que temos como pobo a definirmos o noso sistema educativo en función das nosas condicións e necesidades, unha política antagónica á mercantilización, elitización, uniformización e españolización da universidade galega que supón o actual modelo do Plan Boloña.

Dende Galiza Nova tamén consideramos que é necesario o recoñecemento pleno do dereito da mocidade a traballar, estudar e vivir en Galiza, para combater a emigración xuvenil, mudando a actual consideración positiva da mobilidade xeográfica, que non é máis que emigración encuberta.

Así mesmo, dende o BNG defenderemos o noso dereito a desenvolver as nosas potencialidades nos sectores productivos básicos como creadores de riqueza e de emprego en concreto para moita xente nova. Galiza é un país con grandes potencialidades no sector pesqueiro, no sector agro-gandeiro ou no sector industrial, mais sempre se nos limitou a nosa capacidade productiva, desmantelando os piares básicos da economía galega.

Por parte do nacionalismo galego sempre acreditamos na capacidade productiva do país e por iso agora temos a oportunidade a través da presenza do BNG no Parlamento Europeo de que as galegas e galegos defendamos os nosos intereses.

A DEFENSA DA PAZ, DO ANTIIMPERIALISMO E DOS DEREITOS E LIBERDADES DEMOCRÁTICAS.

Durante os últimos anos determinadas políticas impulsadas pola Unión Europea significaron unha clara involución democrática a respecto dos dereitos e liberdades. O nacionalismo apostará pola defensa das liberdades e a xustiza social especialmente no que se refire a extensión e recoñecemento de dereitos individuais e colectivos nos diferentes pobos de Europa.

Dende Galiza Nova consideramos necesario o recoñecemento da interrupción do embarazo libre e gratuíta, o respecto polas diferentes opcións sexuais, a derogación da Directiva de Retorno que establece criterios de expulsión e retención de inmigrantes e o impulso da laicidade nas nacións de Europa, entre outras cuestións.

Así mesmo o nacionalismo defenderá, como sempre fixo, unha política contraria ao imperialismo e o sometemento, expolio e ocupación dos pobos. Galiza Nova solidarizouse e mobilizouse, como tamén fixo o BNG, en contra da guerra no Iraque, do envío de tropas españolas a Afganistán, do exterminio do pobo Palestiniano por parte do Estado de Israel, entre outros, e consecuentemente en Europa defenderemos un modelo de relacións internacionais en pé de igualdade entre todos os pobos do mundo, baseado na xustiza e na soberanía política das nacións que como Galiza reclaman o dereito a poder decidir libremente o seu futuro.

Dende Galiza Nova, organización xuvenil do BNG, queremos que te sumes a nós para conseguir que Galiza estea representada en Europa. Sabemos que a través do presenza do nacionalismo galego avanzaremos na defensa dos intereses das mozas e mozos, no avance de dereitos, na construcción dun modelo social e económico altenativo ao neoliberal e no recoñecimento do que somos, unha nación con dereito a decidir.

Por iso convidámoste a que o próximo 7 de xuño, te sumes a nós para que Galiza estea en Europa. Para que non decidan por nós. Para sermos protagonistas. As mozas e mozos deste país somos decisivos para que Galiza avance a través do noso voto ao BNG e por iso temos que mobilizarnos para as vindeiras eleccións.

Para que ti contes, para que Galiza conte!

Non faltes e vota BNG!

Pola defensa do dereito ao aborto libre e gratuíto

2009-05-30T11:14:00.001+02:00

A Asemblea de Mulleres de Galiza Nova participará no Maio Reivindicativo que organiza a Marcha Mundial das Mulleres, o vindeiro domingo 31. Este acto está enmarcado dentro da campaña que baixo o lema: En Defensa Do Dereito ao Aborto, Na Sanidade Pública. Eu Decido! está alevar adiante a MMM ao longo do País.

Dende Galiza Nova queremos animarvos a que o domingo a partir das 11 vos acheguedes á Praza da Quintana en Compostela, para reclamarmos o noso dereito a un aborto libre e gratuito na sanidade pública.

A actividade consistirá na construcción dun maio feminista, a lectura de poemas e coplas reivindivativas para reclamar o dereito das mulleres a interrumpir libremente o seu embarazo na rede sanitaria pública, sobre todo no contexto de debate actual sobre a reforma da lei do aborto onde as organizacións da dereita máis reaccionaria teñen amosado ás claras as súas posicións contra os dereitos das mulleres. Así mesmo tamén podes amosar o teu apoio a esta demanda asinando en en www.feminismo.info.

Novo blogue de Galiza Nova Fene

2009-05-29T13:28:00.003+02:00

A comarca de Ferrolterra conta xa cun novo blogue local de Galiza Nova. Trátase da localidade de Fene, onde as compañeiras e compañeiros da organización xuvenil do BNG veñen de pór en marcha un novo espazo virtual, no que irán publicando todas as novas que teñen a ver co concello veciño.

Podes visitar o seu espazo visitando http://galizanovafene.blogspot.com

Galiza Nova organiza en As Pontes un debate sobre o Plan Boloña

2009-05-29T13:23:00.002+02:00

Que é Boloña? Privatízase a Universidade Pública?

Para dar resposta a estas e outras moitas cuestións, as compañeiras e compañeiros de Galiza Nova en As Pontes organizan hoxe unha charla-debate sobre este tema tan relevante e do que pouco se coñezo.

Para ilo, contarán coa presenza de Marcos Loureiro, Responsábel Nacional dos Comités, Elena Sierra, Vicerreitora de Novas Tecnoloxías e Calidade da Universidade da Coruña e Xulio Ferreiro, Responsábel Nacional da CIG-Ensino.

Terá lugar na Casa Dopeso de As Pontes a partir das 20.00h deste serán.

Mitin do BNG en Cabanas

2009-05-28T19:42:00.002+02:00

O vindeiro luns, 1 de xuño, ás 20.00h, terá lugar o mitin do BNG no Concello de Cabanas.

Será na Escola de Laraxe.

Falarán Ana Luísa Bouza, Pablo Villamar e Xosé Manuel P. Sardiña

Imos a Europa... vés!

As JERC, Iratzarri e Galiza Nova asinan un manifesto conxunto para as Eleccións Europeas

2009-05-28T19:19:00.002+02:00

De cara ás próximas eleccións europeas, Galiza Nova, xunto coas organizacións xuvenís doutras forzas da coalición, elaborou un manifesto que afonda na Europa dos Pobos, social e democrática que defendemos, dende a perspectiva xuvenil. No manifesto expóñense as críticas ao modelo neoliberal que está a causar a crise e o deterioro e recurte dos dereitos laborais, así como a precariedade, o paro e a emigración xuvenil. Tamén se critica o Plan Boloña que está a desenvolver a reforma do ensino universitario de xeito antidemocrático, causando unha pivatización, elitización e españolización da Universidade. Así mesmo, tamén se defenden os nosos dereitos lingüísticos e a necesidade de contarmos con soberanái política en Galiza, os Països Cataláns e Euskal Herría para poder decidir libremente o noso futuro.

Manifesto conxunto:

O próximo mes de xuño todas as cidadás e todos os cidadáns maiores de 18 anos dos 27 Estados integrantes da Unión Europea estamos chamados ás urnas coa finalidade de renovar a representación das deputadas e dos deputados que integran o Parlamento Europeo.

Ao longo da súa historia o mapa político europeo sufriu múltiples modificacións debido aos novos contextos políticos, económcios e sociais que mudaron a realidade política dos estados europeos e as súas fronteiras. De feito, vemos coma nos últimos 20 anos foron creados até 17 novos estados. O exemplo máis actual atopámolo en Montenegro, país non integrante da UE, que no ano 2008 exerceu un proceso de autodeterminación a partir das regras que fixou a propia UE.

A UE non pode continar obviando esta realidade dinámica negando o recoñecemento da identidade política, cultural e lingüística de todos os pobos de Europa a través de mecanismos claros e transparentes baseados nun proceso político de autodeterminación, dereito colectivo fundamental recollido na Carta das Nacións Unidas, mediante o cal a poboación dun territorio sexa soberana para decidid o seu futuro.

É necesario insistir en que a UE recoñeza o dereito a decidir dos pobos como un dereito básico elemental e un instrumento que asegure a democratización das institucións europeas e a adecuación da realidade política europea, incluídas as fronteiras, coa vontade dos pobos que a conforman.

Polo xeral, as eleccións europeas non suscitaron moito interese na cidadanía europea. Os factores que explican esta situación son diversos, mais un determinante é a sensación entre a cidadanía de que todo aquilo que se fala e se aproba no Parlamento Europeo parece non ter ningunha repercusión directa sobre as súas vidas, sumado a unha sensación de lonxanía debido á pouca importancia e seriedade coa que se aborda por parte dos medios de comunicación e a escasa información sobre as súas funcións e acordos políticos.

O Parlamento Europeo, que conxuntamente co Consello da UE forma a pola bicameral lexislativa das institucións da Unión é un parlamento de carácter consultivo sen iniciativa lexislativa, pero pode presentar emendas e posee dereito de veto en cuestións relacionadas coas competencias cedidas polos estados, relativas, por exemplo, á protección do medio ambiente, dereitos dos consumidores/as, igualdade de oportunidades, política de transportes e dereitos das traballadoras e dos traballadores, políticas sobre capitais, bens e servizos. Porén, as propostas de leis e directivas da comisión teñen que ser aprobadas polo parlamento e polo consello para poder entrar en vigor. Deste xeito podemos ver que é certo que a influencia directa do parlamento europeo sobre as regulacións da vida pública e privada son, en relación cos parlamentos estatais, limitadas.

As diferentes organizacións xuvenís que conformamos a Europa dos Pobos cremos que é moi importante a implicación da mocidade das nosas nacións nas eleccións europeas para conquerir unha maior representación da coalición no parlamento europeo, coa finalidade de orientar Europa cara outro sentido. Desde o seu inicio, o requisito indispensábel dun territorio para formar parte da Unión Europea foi estar conformado como un estado. Deste xeito imposibilítase a participación das nacións sen estruturas estatais na discusión dos asuntos públicos europeos nun marco de igualdade co resto das nacións. Os Països Catalans, Galiza, e Euskal Herria son hoxe nacións sen estado, e polo tanto non teñen representación por si mesmos no Consello de Europa, senón que son os presidentes e ministros dos estados Español e Francés os que os representan, non respostando así ás arelas, desexos e necesidades que como pobos diferenciados temos. Por isto dende a candidatura da Europa dos Pobos, Galiza Nova, Iratzarri e as JERC cremos que é necesaria a construción dunha Europa respectuosa coa diversidade nacional, cultural e lingüística.

Para isto tense que posibilitar un maior prtagonismo das nacións que están na mesma situación cás nosas a través do recoñecemento do dereito á autodeterminación dos pobos que xa forman parte da Unión Europea. Deste xeito as nosas organizacións apostamos polo recoñecemento político dos Països Catalans, Galiza e Euskal Herria no seo da UE a partir do exercicio do dereito á autodeterminación, para poder decidir libremente o noso futuro.

Neste sentido, Iratzarri, Galiza Nova e as JERC tamén queremos manifestar o noso compromiso cunha Europa respectuosa cos dereitos e liberdades democráticas, cunhas relacións internacionais baseadas na paz e na relación igualitaria entre todos os pobos do mundo, opoñéndonos ao imperialismo e pulando por un modelo social que poña por encima dos intereses económicos o benestar das persoas.

Reivindicamos un modelo social que se basee na xustiza social e que faga posíbel a cobertura das necesidades das cidadás e dos cidadáns mediante a protección social e os servizos públicos (atención sanitaria, vivenda, educación...).

As políticas neoliberais están acabando cos dereitos sociais conqueridos a través da mobilización da clase traballadora e da sociedade en xeral, procurando eliminar o mínimo de seguridade e estabilidade a todas as cidadás e cidadáns.

Cremos que se demostrou o fracaso do modelo neoliberal e que é necesario un modelo alternativo a favor das clases populares, compartindo no seo da Unión en contraste a outros sistemas de “protección” onde a individualidade é a característica propia das políticas (como o dos Estados Unidos de América).

En consecuencia, as organizacións asinantes deste manifesto fan unha aposta por unha orde económica e social xusta e solidaria, contraria ao imperialismo, que condena o sometemento, expolio, marxinación, negación e incluso ocupación de moitos pobos do mundo. Apostamos por unha Europa das e dos traballadores, que democratice a economía e redistribúa a riqueza, unha Europa con xustiza social.

Así mesmo, desde a perspectiva xuvenil e tendo en conta a crise económica actual, fai falla unha coordinación na protección social da mocidade como un dos colectivos máis afectados polo desemprego, a inestabilidade e a precariedade laboral e a imposibilidade de desenvolver un proxecto de vida propio libremente.

Por todo isto, Galiza Nova, Iratzarri e as JERC, como organizacións xuvenís da coalición da Europa dos Pobos, propoñemos as seguintes propostas programáticas conxuntas que van nos respectivos programas electorais que fixeron as diferentes formacións xuvenís:

-A adopción de medidas concretas a favor do emprego digno e estábel cuns salarios dignos para a mocidade que teñan como obxectivos:

a) Eliminar a estrutural precariedade do emprego xuvenil, limitando de xeito garantista as modalidade de contrato temporale poñendo en marcha medidas para a supresión das Empresas de Traballo Temporal a nivel europeo.

b) A defensa dunha política de creación de postos de traballo sobre a base do desenvolvemento endóxeno das diferentes economías nacionais que garantan as posibilidades de traballo no propio territorio, especialmente nos sectores produtivos básicos das diferentes nacións.

c) Pularemos para o estabelecemento das 35 horas semanais a nivel europeo para repartir o traballo e mellorar a produtividade.

d) Estabelecer unha fórmula común de cálculo do salario mínimo a nivel europeo para garantir a percepción dun salario digno.

-Recoñecemento pleno do dereito da mocidade a traballar, estudar e vivir no seu propio territorio, como principio rector das políticas para facer fronte ao fenómeno da emigración xuvenil, mudando a actual consideración positiva da mobilidade xeográfica, emigración encuberta, no seo da UE.

-As organizacións xuvenís das forzas políticas da coalición apostamos por unha política universitaria baseada na consideración da universidade como un sevizo público esencial e o dereito como pobo a definir o noso sistema educativo en función das nosas condicións e necesidades, unha política claramente antagónica á mercantilización, elitización, uniformización e españolización da universidade, que supón o actual modelo de EEES.

-Defensa dunha política lingüística e cultural europea que garantice realmente a defensa, igualdade e normalización das culturas e oficialización das linguas minorizadas de todas as nacións sen estado existentes na UE, prestando especial atención á situación desas linguas e culturas entre a xente nova e a garantía dos dereitos lingüísticos e culturais, sobre todo en eidos como o ensino.

-As organizacións xuvenís da coalición apostamos pola extensión de dereitos e liberdades en todos os territorios europeos especialmente no recoñecemento e garantía á interrupción voluntaria do embarazo libre e gratuíta. Tamén consideramos necesarios programas de fomento e respecto das diferentes opcións sexuais, identidade de xénero-sexual, contra o racismo e a xenofobia, o fomento da paz, a non violencia e o antiimperialismo, e a aposta por un modelo económico e social sustentábel.

As organizacións xuvenís da coalición apoiamos a presenza das nosas nacións nas actuais redes de información xuvenil a nivel europeo e instamos á modificación das súas funcións de xeito que deixen de ser instrumentos propagandísticos de politización no modelo actual da UE.

Neste senso, apostamos por garantir o pluralismo, a eficiencia e as facilidades no acceso á información de maior interese xuvenil por parte do asociacionismo xuvenil, prestando especial atención á difusión e perticipación das organizacións xuvenís das nacións sen estado.

Porque outra Europa é necesaria, para levar a voz da mocidade de Galiza, Països Cataláns e Euskal Herria, facemos un chamamento á xente nova das nosas nacións a que apoie a candidatura impulsada por ERC, BNG e Aralar: Europa dos Pobos – Verdes e para que o próximo día 7 de xuño se mobilicen e participen nas eleccións votando por unha Europa dos pobos, social e democrática.

Europeas09: Mitin do BNG en Ferrol

2009-05-26T17:44:00.002+02:00

Acode ao mitin do BNG en Ferrol o vindeiro xoves 28 de maio ás 20.30h! Será no Teatro Jofre e falarán Manolo Pazo, Helena Veiguela, Guillerme Vázquez e Ana Miranda

Europeas09: Vídeo electoral do BNG

2009-05-26T17:43:00.001+02:00

Europeas09: Como votar por correo

2009-05-26T17:40:00.000+02:00

O vindeiro 7 de Xuño celébranse as eleccións Europeas. Para Galiza Nova, organización xuvenil do BNG, estas son unhas eleccións moi importantes porque durante estes anos Galiza non estivo representada directamente, nunhas institucións onde se van tomar decisións fundamentais para o futuro do noso país. Queremos contar co teu apoio para facer que Galiza, a través da representación do BNG, teña voz e voto en Europa. Para que as galegas e galegos esteamos representados e poidamos defender unha Europa dos pobos e democrática, que recoñeza a diversidade nacional, cultural e lingüística. Para impulsar unha Europa social e xusta contraria ao modelo neoliberal que causou a actual crise económica e a reforma do ensino a través do Plan Boloña. Para defender os nosos sectores productivos (o agro, a pesca, o naval…) como xeradores de emprego e riqueza en Galiza. É por iso que precisamos do teu apoio ao BNG, para avanzar nas necesidades e aspiracións da xente nova: no dereito a un traballo digno na propia Terra, no dereito a un ensino público, galego e de calidade, no recoñecemento oficial do galego na UE… Por iso che pedimos o teu apoio: para que ti contes, para que Galiza conte!!

Se vas estar noutra localidade do Estado Español diferente de onde che corresponde votar, podes votar por correo:

1. Ata o 28 de maio, vai a calquera oficina de correos co Documento de Identidade, e cubre o modelo para solicitar o certificado de inscrición no censo electoral. O enderezo que indiques será a onde che envíen toda a documentación.

2. Do 18 ao 31 de maio, remitiranche a documentación para poder votar ao enderezo que indicaches (certificado de inscrición, papeletas e sobre electoral, enderezo da mesa onde che corresponde votar e folla explicativa de todo o proceso).

3. Con esta documentación elixe a papeleta de voto e introdúcea no sobre de votación, logo métea noutro sobre co enderezo da mesa electoral, xunto coa inscrición no censo.

4. Ata o 3 de xuño tes de prazo para enviala por correo certificado e urxente.

*TODO O PROCESO É DE BALDE.

*UNHA VEZ QUE SOLICITAS O VOTO POR CORREO (AÍNDA QUE DESPOIS DESISTAS) IMPIDE O VOTO PRESENCIAL NA MESA ELECTORAL O DÍA DAS ELECCIÓNS.

Ningún paso atrás co galego!

2009-05-18T11:00:00.002+02:00

Máis de 50.000 persoas participaron onte na maior manifestación da historia en defensa da nosa lingua.

O acto, organizado por A Mesa pola Normalización Lingüística e apoiado por centos de organizacións, entre elas Galiza Nova e o BNG superou todas as espectativas de participación, servindo para demostrar a Feijóo que as galegas e galegos non queremos ningún paso atrás na defensa do galego e que estaremos dispostos a saír ás rúas cantas veces sexa necesario para que iso non aconteza.

[Imaxes do acto]: Fonte: Gznación, Vieiros, A Nosa Terra, CIG, La voz de Galicia

Manifestación en defensa da lingua

Non deixes que esmaguen a nosa lingua!

2009-05-15T15:03:00.004+02:00

A día de hoxe na nosa nación, o galego, a nosa lingua propia, vive unha situación de desigualdade a nível público e social, de perda de falantes xeración tras xeración e de discriminación das e dos galegofalantes cando queren exercer o seu dereito básico a poder desenvolver a súa vida integrametne e con naturalidade en galego.

Froito dos intentos de avanzo na normalización da nosa lingua que impulsou o BNG durante a súa participación do goberno da Xunta, determinados grupos sociais minoritarios, apoiados dende sectores do poder, teñen lanzado a idea, nos últimos meses, de que en Galiza se estaba a vivir unha situación de "imposición del gallego" que nada se corresponde coa realidade.

Onde están as películas en galego nas salas de cinema? Onde están os videoxogos en galego? Canta prensa diaria podemos ler en galego? Cantas emisoras de música para xente nova podemos escoitar onde as e os locutores falen galego? Por que non temos dereito a recibir un ensino en galego e aprender a nosa lingua? A resposta a calquera destas preguntas mostra a situación real e evidencia que minten os que non recoñecen que é o galego o que vive unha situación de indefensión e marxinación.

Mais temos que denunciar tamén que o PP, que durante este tempo estivo dando cobertura a estes grupos antigalegos, pretenda a través do goberno da Xunta de Galiza retroceder na normalización do galego e eliminar as medidas que procuraban un avanzo nos usos da lingua, en concreto en ámbitos coma o ensino. É por iso que as mozas e mozos galegos nos opoñemos a estes ataques contra o galego e defendemos o dereito que temos de recibir un ensino na lingua propia de Galiza. Así mesmo, apostamos pola posta en marcha de novas medidas para o avanzo da lingua galega, ademais de no ámbito educativo, en sectores tan importantes coma os servizos públicos, os medios de comunicación, o lecer e as novas tecnoloxías... e chamamos a toda a sociedade e, especialmente á mocidade, a mobilizarnos contras as agresións ao galego, porque non son máis que unha agresión cara a nosa nación, cara todas e todos os galegos e o que nos une. É por iso que necesitamos o teu compromiso para frealos e que non esmaguen a nosa lingua: defende con nós o idioma que nos une!

[Descarga]: Clic aquí para baixar o panfleto da campaña

Galiza Nova participa na manifestación a prol do galego!

2009-05-12T08:01:00.006+02:00

Galiza Nova participará na manifestación que este vindeiro domingo percorrerá as rúas de Santiago de Compostela na defensa do galego fronte aos ataques que está a recibir dende distintos grupos.

Baixo o título "O galego, a nosa columna vertebral", a manifestación convocada por A Mesa pola Normalización Lingüística partirá ás 12.00h da Alameda de Santiago.

Haberá servizo de autobuses dende varios puntos de Galiza.

Dende a nosa comarca, serán os seguintes:

10.00h Saída de Ferrol (Jofre) con parada na gasolineira do Polígono Vilar do Colo e regreso unha hora após da manifestación.

10.00h Saída do local comarcal da CIG (Avda Esteiro, Ferrol). Regresa ás 14.30h

9.15h Saída de Cedeira con parada en Valdoviño. Regresa ás 17.00h.

10.00h Saída de As Pontes e parada en Pontedeume. Regresa ás 17.00h.

10.00h Saída do Concello de Fene. Regreso ás 17.00h

Para máis información, chamar ao 981.563.885

ORFEU: O voceiro comarcal de Galiza Nova

2009-05-03T16:59:00.002+02:00

Xa está na rúa ORFEU, o primeiro número do voceiro comarcal de Galiza Nova, que recolle no seu nome a esencia das tres comarcas naturais ORtegal, Ferrolterra e EUme.

Neste primeiro texto abórdanse temas como a situación dos ríos Eume e Chamoselo, o transporte público na comarca ou o proceso de Boloña.

[Descarga]: Clic aquí para descargar o ORFEU

A mocidade galega contra a crise. Por un sistema económico xusto!

2009-04-29T20:33:00.002+02:00

Con ese lema Galiza Nova participará nas diferentes manifestacións que se levarán a cabo o vindeiro 1 de maio, Día da Clase Traballadora.

Na nosa comarca, Galiza Nova participará da manifestación que organiza a CIG, e que sairá ás 12.00h do local sindical, situado na Avenida de Esteiro de Ferrol.

Acude!

Galiza Nova asiste á celebración do 25 de abril en Portugal

2009-04-29T20:27:00.003+02:00

A pasada fin de semana tiveron lugar unha serie de actividades conmemorativas do 25 de abril, data na que o pobo portugués xunto co apoio militar conseguía pór fin ao réxime fascista de Salazar.

A nosa Organización, coa representación da Secretaria Xeral, Iria Aboi, estivo presente nos actos organizados na cidade de Ovar, distrito de Aveiro, pola comisión promotora dos eventos conmemorativos da Revolución dos Caraveis impulsada fundamentalmente polo sindicato portugués CGTP.

Galiza Nova presenta en rolda de prensa o programa de mocidade

2009-02-27T00:04:00.002+01:00

A organización xuvenil do Bloque desenvolverá estes días na comarca unha campaña orientada a que “o BNG lidere o goberno galego”.

O Responsábel Comarcal de Galiza Nova e Candidato ao Parlamento de Galiza, Iago Varela Martínez, presentou onte en rolda de prensa o programa de mocidade do Bloque Nacionalista Galego.

Iago Varela lembrou que a Xunta de Galiza impulsou nestes últimos anos medidas que viñan sendo demandadas pola poboación xuvenil. “Coa entrada do BNG no Goberno da Xunta, a mocidade comezou a ter un espazo propio e ben definido, mentres que cos gobernos do PP era un dos sectores máis desprotexidos”.

Tendo en conta a situación económica, para Galiza Nova é unha prioridade pular por un traballo digno. Por iso dende o BNG desenvolverase un Plano de Emprego Xuvenil, para materializar o dereito a un traballo no propio país, e o Salario Social, destinado á xente que procura o seu primeiro emprego tras un período de formación.

O traballo a prol dun ensino “realmente público”, a consolidación da Rede de Centros Quérote e Locais de Ensaio, a elaboración dun novo lano de Financiamento da Universidade ou a mellora do transporte público, son outros dos retos do BNG en materia de xuventude.

Esta presentación enmárcase dentro da campaña que Galiza Nova levará a cabo durante esta semana, “traballaremos para que o vindeiro un de marzo a xente nova aposte por Anxo Quintana para presidir a Xunta de Galiza, porque é o único candidato que porá á mocidade no centro da súa atención” sentenciou Iago Varela.

A forza que Galiza precisa

2009-02-25T16:36:00.004+01:00

No ano 2005, comezouse a escribir unha nova etapa na historia de Galiza. A chegada do BNG ao goberno da Xunta de Galiza, trouxo un cambio positivo que rachou con 16 anos de políticas nefastas para os intereses de Galiza e da súa mocidade.

Desterramos os discursos paternalistas e os prexuízos que criminalizaban as formas de expresión da xente nova. O BNG púxolle voz ás demandas de tantos anos do colectivo xuvenil e elevou o status das políticas xuvenís, poñéndoas no centro das prioridades do Goberno Galego. Ao longo destes tres anos e medio, o nacionalismo galego desenvolveu unha acción política transformadora encamiñada a defender os intereses da maioría social de Galiza e concretamente da xente nova, con medidas concretas:

Puxemos en marcha a Rede Galega de Locais de Ensaio (Nsaio), con máis de 30 locais en vilas e cidades para a creación musical da xente nova en Galiza.

Creamos a Rede de centros de Asesoramento Afectivo-Sexual, Quérote, nas 7 cidades e Burela, como espazos públicos que garanten o dereito de toda moza ou mozo a acceder de xeito gratuíto a un sistema de información e asesoramento en materia afectivo-sexual, rigoroso, científico e confidencial.

A través da Consellaría do Medio Rural facilitouse que máis de 4.400 mozas e mozos se incorporaran ao traballo no rural, o que supón tres veces máis que en toda a lexislatura anterior.

Desenvolvemos unha política de rehabilitación, alugueiro e construción de vivenda protexida destinada a facer realidade o dereito á vivenda digna.

Creamos axudas para a xente nova que estuda ciclos formativos a máis de 50km do seu domicilio, que até o de agora non existían.

Desenvolvemos políticas a través da Consellaría de Innovación e Industria facéndolle contratos de traballo ás novas e novos investigadores.

Impulsamos o desenvolvemento dos partidos das seleccións deportivas de Galiza tanto masculinos como femininos en fútbol, baloncesto, balonmán... e apoiamos o deporte de base a través das escolas deportivas onde participan milleiros de mozas e mozos.

Pero precisamos máis. No BNG aspiramos a continuar o proceso que comezamos para que as transformacións sexan máis profundas. Non queremos volver ao pasado, queremos máis avanzos. Como mozas e mozos queremos ter garantido o noso futuro, tamén o noso presente, e o dereito a poder traballar e vivir na nosa propia terra desenvolvendo todas as nosas aspiracións e potencialidades. Por iso precisamos de máis BNG no goberno galego. Precisamos do teu apoio para poder desenvolver integramente o noso programa:

Aprobar e desenvolver a Lei Galega da Mocidade, como instrumento que permita elevar o rango das políticas xuvenís.

Impulsar a elaboración dun Plano Plurianual de Emprego Xuvenil, para garantir o dereito da mocidade galega a ter un posto de traballo digno no país.

Crear o salario social, destinado a todas as persoas desempregadas, priorizando a aquelas que, após dun período de formación, bucscan o seu 1º emprego e que na actualidade non perciben ningún tipo de proteción social. Esta medida xeraría un chanzo mínimo por debaixo do cal ningún mozo ou moza estaría disposto a aceptar un traballo evitándose as contratacións en precario.

Incorporar a 5.000 investigadores e tecnólogas/os novos ao sistema galego de I+D+i, creando unha modalidade específica para persoas con titulación da Formación Profesional.

Incrementar a oferta pública de vivendas protexidas tanto en réxime de alugueiro como de compra, reservando unha porcentaxe do 35% con adxudicación preferente á mocidade.

Impulsar, a través de acordos coas Universidades e os Concellos, a construción de vivendas para o seu aluguer nos campus universitarios sen residencia pública, ou cunha oferta menor ao 10% do alumnado, primando as rendas máis baixas na súa adxudicación.

Aumento do financiamento dos centros públicos e eliminación dos concertos educativos co ensino privado.

Cumprimento do Decreto 124/2007 que regula o uso do galego no ensino e creación dun organismo entre a Xunta de Galiza e as tres universidades, tal e como establece o Plan Xeral de Normalización da Lingua Galega, encargado da planificación, desenvolvemento e seguimento dunha política lingüística universitaria en Galiza.

Reorganización da oferta de formación profesional e bacharelatos a fin de adaptala ás necesidades de Galiza.

Elaboración dun novo Plan de financiamento plurianual das Universidades Galegas, que permita reducir o peso das taxas no financiamento e conxelalas nos vindeiros cursos.

Conquerir a transferencia da competencia plena en materia de bolsas para a Xunta de Galiza, redefinindo os criterios de concesión a fin de darlle máis peso aos criterios económicos que aos académicos e axilizando a súa concesión.

Establecemento de prezos públicos para os estudos de posgrao así como creación dunha política de bolsas públicas para cursalos.

Extensión da gratuidade do transporte ao estudantado de Bacharelato.

Reforzo do programa de transporte nocturno. Incremento de liñas e ampliación da cobertura ao conxunto do territorio galego non centrándoo exclusivamente en período vacacional.

Asinar convenios entre a Administración e as compañías aseguradoras co fin de abaratar os prezos dos seguros para a mocidade.

Consolidación e ampliación da Rede Galega de Locais de Ensaio creada na pasada lexislatura.

Remate e consolidación da Rede de Centros Quérote garantindo como mínimo a existencia dun Centro Quérote en todos os concellos de máis de 35.000 habitantes.

Ampliación do número de unidades especializadas para o tratamento de trastornos alimenticios dentro do SERGAS, proporcionando unha cobertura adecuada a todo o territorio galego.

Dende Galiza Nova, organización xuvenil do BNG, queremos que te sumes a nós para que Galiza teña máis avanzos. Para continuar a facer de Galiza un país máis xusto, máis próspero, con máis autogoberno e máis benestar para a xente nova. Unha Galiza orgullosa da nosa identidade pois só asó, sendo nós mesmos, poderemos ter un papel relevante no Estado e no mundo. Unha Galiza que crea na nosa capacidade para xerar riqueza e futuro para a sociedade galega, para as súas mozas e mozos. Unha Galiza para traballar, producir, e vivir con dignidade.

Hai catro anos, as mozas e mozos quizemos rachar co pasado en Galiza. Fomos decisivos para que o nacionalismo gobernase no noso país con capacidade e valentía. O día 1 de marzo temos que ir votar. Hai que non quere que sigamos a avanzar. Pero as mozas e mozos ímoslles contestar co noso voto. Non imos quedar caladas nen calados.

Porque se a mocidade vota BNG, Galiza gaña!

Mitin en Cabanas

2009-02-19T18:52:00.003+01:00

Mañá venres 20, ás 20.00h na Escola de Lavandeira, mitin do Bloque Nacionalista Galego.

Contará coas intervencións de

Xosé Manuel Pérez Sardiña, Voceiro do Grupo Municipal do BNG

Xoán Carlos Bascuas, Delegado da Consellaría de Vivenda

Iago Varela Martínez, Candidato por A Coruña

O BNG ten as solucións contra a crise. Vota BNG!

2009-02-17T22:38:00.000+01:00

Vota BNG

2009-02-13T23:38:00.001+01:00

Convención Electoral do BNG

2009-01-08T22:40:00.003+01:00

O vindeiro sábado 17 de xaneiro ás 18 horas no Pavillón do Restollal de Santiago de Compostela terá lugar a Convención Electoral Nacional do BNG.

Neste acto, o Bloque Nacionalista Galego presentará á sociedade a súa candidatura ás Eleccións Autonómicas 2009.

Visualizar o mapa ampliado

Concentración en solidaridade co pobo palestino

2009-01-08T19:41:00.005+01:00

Galiza Nova, xunto con outras moitas organizacións, participará mañá na concentración que baixo o lema "Deteñamos o terrorismo sionista" servirá para amosar a nosa solidaridade co pobo palestino.

Dita concentración terá lugar ás 20.00h diande do edificio da Xunta de Galiza de Ferrol. Agardamos contar coa túa presenza!

Resolución da Asemblea Comarcal do BNG de Ferrolterra

2009-01-05T13:03:00.001+01:00

Perante a situación que está a sofrer o pobo palestino – nomeadamente na franxa de Gaza – nos últimos días, a Asemblea Comarcal do BNG quere expresar públicamente:

1.- O rexeitamento rotundo aos bombardeos levados a cabo por parte do exército de Israel – neste momento con perto de 500 mortos nas últimas accións – e que veñen a evindenciar que o colofón á blocaxe perpetrada polo Estado de Israel contra o pobo de Gaza constitúe verdadeiramente un crime de guerra.

2.- Reiteramos – como así se fixo xá por medio da correspondente iniciativa parlamentar – a petición de que o Estado Español suspenda as relacións diplomáticas e económicas co Estado de Israel ata que non se poña fin á agresión militar e blocaxe que o mesmo está a perpetrar na franxa de Gaza.

3.- Solicitamos, asimesmo, que o Estado Español inste oficialmente ao cumprimento das reiteradas resolucións da ONU relativas á retirada israelí dos territorios ocupados; ao tempo que se demande, no marco das Nacións Unidas, o envío inmediato dunha misión de observación e interposición co fin de garantir a fin da blocaxe e da agresión militar.

4.- A Asemblea Comarcal do BNG resolve, en liña cos apartados anteriores, remitir sendos escritos de condena da situación ao Presidente do Goberno Español, Ministerio de Asuntos Exteriores e Embaixada de Israel; ao tempo que transmitir a solidariedade e apoio á representación do pobo de Palestina en Galiza.

Galiza Nova denuncia a pasividade e a despreocupación polo Río Chamoselo

2008-12-30T09:40:00.002+01:00

A organización xuvenil do BNG asegura que non existen solucións a curto prazo para o río

A pesares de que os informes encargados en 2007 polo BNG advertían da mala situación do río, co cambio de goberno municipal de As Pontes estes resultados foron iñorados.

Pouco tempo despois, os pescadores de Caaveiro denunciaron a morte de reos no Eume debido a un baixo Ph que os devanditos informes xa recollían e que aínda hoxe continúa. Perante esta situación, os únicos interesados no ámbito político son as formacións nacionalistas, que comezan a denunciar dende o primeiro momento esta situación.

O deputado Blanco Parga rexistrou no Parlamento preguntas para o Conselleiro de Media Ambiente, e Galiza Nova organizou en As Pontes unha charla sobre a problemática á que só asistiu ADEGA, refusando participar as Consellarías de Medio Ambiente e Política Territorial, convidades ao acto e directamente implicadas no desastre ecolóxico.

Dende Galiza Nova aseguran que "seguimos a reiterar a nosa preocupación pola situación dos ríos afectados e esiximos aos responsábeis medidas eficaces para recuperar o máis axiña posíbel todo aquilo que se perdeu por mor da deixadez".

Para a formación nacionalista "é importante que exista un equilibrio entre o desenvolvemento e progreso e a conservación e respecto polo noso medio natural".

"Por moita inauguración que fixera a Conselleira de Política Territorial, cremos que non pode presumir de autovía" aseguran dende Galiza Nova.

Éxito do I Campionato de Futbolín Unha Nación Unha Selección!

2008-12-28T11:32:00.004+01:00

O I Campionato de Futbolín do Eume organizado polas asembleas locais de Galiza Nova en Cabanas e Pontedeume, que tivo lugar o pasado venres no bar El Griego foi todo un éxito.

Un total de 16 parellas participaron deste campionato, pero foron máis as que quixeron inscribirse a última hora, ás que non puidemos acoller por razóns de organización.

Dado o éxito e interese mostrado pola mocidade dos arredores, o vindeiro ano celebrarase unha nova edición na que teremos en conta estas peculiaridades para que todo o mundo que quixer poida participar.

Resultados

As parellas foron divididas mediante sorteo en catro grupos de catro parellas cada un. Clasificouse a primeira de cada grupo tras xogar unha liga. Os catro clasificados loitaron polo primeiro posto mediante eliminatorias.

Os vencedodres desta edición foron Iago Castro e Fran Iglesias. O segundo posto copáronno Raúl Calvo e Luís Tenreiro. En terceiro lugar quedaron Carlos Cernadas e Damián Amado.

As tres parellas foron agasalladas con 2 entradas para o partido Galiza-Irán. Ademais os terceiros clasificados levaron 2 fundas de móbil. A segunda e a primeira parella levaron tamén 2 camisolas e, esta última, un trofeo.

Podes descargar na seguinte ligazón todos os resultados do I Campionato de Futbolín do Eume "Unha Nación, Unha Selección": CLIC AQUÍ

XX anos de Galiza Nova en exposición

2008-12-25T12:51:00.002+01:00

Mañá, venres 26 de decembro ás 17.30h na Casa da Mocidade de Narón terá lugar a inauguración da exposición conmemorativa dos XX anos de Galiza Nova, acto que contará coa presenza de Pablo Villamar, vicepresidente da Deputación de A Coruña.

A exposición permanecerá na propia Casa da Mocidade de Narón entre os días 26 e 29 de decembro no horario habitual de apertura do centro

Anótate no I Campionato de Futbolín "Unha Nación Unha Selección!"

2008-12-15T10:15:00.002+01:00

Galiza Nova Cabanas, en colaboración cos compañeiros e compañeiras de Pontedeume, organiza o venres 26 de decembro ás 20:00 horas no bar “El Griego” de Pontedeumeo I Campionato de Futbolín “Unha Nación, unha selección!”.

O motivo deste campionato é ben sinxelo, non é outro que o de reclamarmos o dereito para que a selección da nosa nación, Galiza, poida competir a nível internacional, é dicir, nas competicións que organiza a FIFA, nin máis nin menos do que outras seleccións de nacións e rexións sen Estado, coma Gales, Escocia ou as Illas Féroe. Máis aínda, cando a imposibilidade xurídica non é insalvábel. A FIFA admitirá á nosa selección só con que a Federación Española de Fútbol levante o veto á participación das seleccións das nacións que hoxe configuran o Estado nas súas competicións.

Deste xeito, só unha decisión federativa da RFEF, nada máis (e nada menos) separa á nosa selección de competir no mundo, mais tamén nos separan os rexos mecanismos centralistas que o Estado Español engraxa cada día.

Por iso, e para visibilizar a nosa posición que mellor que facelo dunha forma lúdica e cun invento galego: o futbolín, do gran Alexandre de Fisterra.

QUEN PODE PARTICIPAR?

Pode participar calquera persoa que así o desexar, sen límite de idade. Alén diso, a composición das parellas é libre, é dicir, os membros poderán ser dun mesmo sexo ou mixtas.

COMO ANOTAR A MIÑA PARELLA?

Podes anotar a túa parella mandando un correo electrónico ás seguintes direccións:

galizanovacabanas@gmail.com ou gznovapontedeume@gmail.com

onde deben constar os seguintes datos:

- Nome e Apelidos de cada membro da parella
- Un número de teléfono
- Unha dirección de correo electrónico

Tamén podes anotar a túa parella chamando a un dos seguintes teléfonos:

690 384 294 ou 654 666 558.

Os 2 euros que custa a inscrición será entregada o mesmo día do Campionato.

QUE PREMIOS HAI?

1º Premio:

1 trofeo acreditativo de seren os vencedores do Campionato
2 entradas para o encontro da selección galega en Riazor
2 camisolas

2º Premio:

2 entradas para o encontro da selección galega en Riazor
2 camisolas

3º Premio:

2 entradas para o encontro da selección galega en Riazor
2 fundas “Galiza” para o móbil

Alén diso, haberá un agasallo para todos os participantes.

Sen máis, desde Galiza Nova de Cabanas e Pontedeume agardamos que te sumes a participar deste I Campionato de Futbolín “Unha Nación, unha selección!” para reclamarmos así os lexítimos dereitos da nosa Selección.

Vémonos o venres 26 de decembro ás 20:00 horas no bar “El Griego”!

Galiza Nova de Cabanas manifesta a súa condena e repulsa polo asasinato de Ignacio Uría a mans de ETA

2008-12-03T18:42:00.002+01:00

Galiza Nova de Cabanas quere expresar neste comunicado “a súa máis enéxica condena e repulsa perante o crime do empresario basco Ignacio Uría, asesinado a tiros este mediodía por dous presuntos terroristas de ETA na localidade guipuzcoana de Azpeitia.

Galiza Nova transmite as súas condolencias e a súa solidariedade aos familiares da vítima de ETA nestes difíceis e duros momentos.

A formación nacionalista manifesta a súa repulsa ante os actos terroristas que anulan a vida, “unha violencia que repugna a conciencia democrática e pacifista do pobo galego”.

Ademáis, os nacionalistas galegos apelan á unidade democrática porque “máis que nunca se precisa da fortaleza e da unidade de todas as forzas políticas con representación nas Cortes do Estado como o instrumento fundamental para derrotar o terrorismo”.

Galiza Nova chama á unidade política entre todos os demócratas fronte a barbarie terrorista que atenta contra o dereito máis fundamental que temos os seres humanos, o dereito á propia vida.

26 de novembro, folga estudantil: PAREMOS AS AGRESIÓNS CONTRA O GALEGO

2008-11-14T11:45:00.002+01:00

Hai dous anos xa houbo un paro xeral nos institutos para reivindicarlle á Consellaría de Educación que tomase medidas en defensa do galego no ensino. O éxito desa folga, coa participación de máis de 60.000 estudantes segundo datos oficiais, foi fundamental para que a Consellaría de Educación tivese que elaborar unha nova norma de galeguización do ensino, o decreto 124/2007.

Comezado un novo curso, vemos con preocupación como se esfarelan as boas expectativas que había sobre a aplicación deste decreto. A realidade é que:

Na maior parte dos centros non se cumpre coa lexislación;
a Consellaría de Educación aínda non fixo públicos datos nin avaliacións reais sobre o grao de aplicación do decreto no curso pasado (malia o propio decreto indicar que ten que facerse);
seguen sen pórse en funcionamento as medidas e os medios demandados desde a comunidade educativa.

Todos os adiantos experimentados pola nosa lingua foron sempre froito da reivindicación, moitas veces protagonizada pola xente nova. Visto que é a saída que nos deixan, dende Galiza Nova, a Mocidade pola Normalización Lingüística e os Comités facemos un chamamento a parar as aulas o vindeiro 26 de novembro. Pararemos a inactividade da Consellaría de Educación. Pararemos as agresións ao idioma de Galiza.

Preocúpanos moito tamén a vaga de declaracións e accións contra a lingua do país que se están producindo case a diario desde os sectores máis reaccionarios. Teledirixidos por poderosos grupos económicos, políticos e mediáticos de fóra de Galiza, din defender cinicamente o “bilingüismo” e a “liberdade” cando na realidade só pretenden seguir marxinando o noso idioma, mantelo desamparado e, finalmente, facelo desaparecer.

Pararemos os institutos para dicirlle a eses grupos que os estudantes de Galiza defendemos o noso idioma. Falemos castelán ou falemos galego, queremos que se tomen medidas de apoio a un vínculo que nos une como galegas e galegos, que é unha riqueza común e un patrimonio para a humanidade.

Contra estes ataques que nos queren negar a voz e os dereitos tamén é necesario que nos movamos. Digámoslles que a inmensa maioría das galegas e dos galegos desexamos para o galego o mellor dos futuros. Porque garantir o futuro da nosa lingua é garantirmos o noso propio futuro.

Galiza Nova mobilizarase coa CIG contra a crise

2008-11-03T21:43:00.002+01:00

Galiza Nova que durante os seus vinte anos de existencia sempre defendeu a necesidade do cambio do actual modelo socioeconómico por outro máis xusto amosa o seu apoio á campaña posta en marcha pola CIG para denunciar aos responsábeis da actual situación da crise económica e as nefastas repercusións que as medidas tomadas polo goberno do Estado terán sobre as traballadoras e traballadores. Neste sentido Galiza Nova tamén secundará as manifestacións convocadas o 13 de novembro pola CIG en diferentes puntos do país. Vai a ler máis:

A Mariña: Saída ás 19:30 da Praza Maior de Viveiro
A Coruña: Saída ás 20:00 horas da Praza da Palloza.
Ferrol: Saída ás 19:30 da Avenida de Esteiro, diante do sindicato.
Lugo: Saída ás 20:00 h da Ronda da Muralla, diante do sindicato.
Ourense: Saída, ás 20:00 h do pavillón dos Remedios.
Pontevedra: Saída ás 20:30 h da Praza da ferrería.
Santiago: Saída ás 20:00 h da Praza Roxa.
Vigo: Saída ás 20:00 da Vía Norte.

A Selección Galega Feminina de Fútbol Sala subcampiona do mundo!

2008-10-10T11:20:00.002+02:00

As xogadoras da Selección Galega de Fútbol Sala conseguiron que Galiza quedase subcampiona do mundo nesta modalidade no partido que disputaron o pasado domingo en Reus. A nosa selección xogou a final contra Catalunya, que venceu ás Irmandiñas por 4-0.

Maila non ter gañado a final, dende Galiza Nova de Cabanas queremos darlles oss parabéns por todo o campionato, por demostrar a inmensa potencialidade do fútbol sala feminino e por seren mozas galegas as que conseguiron este éxito.

Parabéns, e a seguir colleitando éxitos!

A Secretaría Xeral de Política Lingüística responde á pregunta do BNG sobre a toponimia en Cabanas

2008-09-30T20:42:00.003+02:00

A Secretaría Xeral de Política Lingüística ven de emitir resposta á pregunta formulada polos deputados nacionalistas Bieito Lobeira e Fernando Blanco Parga a propósito da denuncia que fixemos dende Galiza Nova de Cabanas sobre o uso da toponimia ilegal nunha marquesiña de nova instalación que o ADIF colocou no apeadoiro municipal.

A Secretaría Xeral de Política Lingüística (SXPL) lamenta profundamente que aínda no 2008, na instalación de novas infraestructuras de servizos aos pasaxeiros, sigan aparecendo desaxustes, se ben anecdóticos, no reflexo da realidade toponímica de Galicia; desexamos e pulamos porque estas anécdotas desaparezan definitivamente no curto prazo, conseguindo así unha plena normalidade ndo idioma galego na área do transporte ferroviario. A SXPL adoptará tres medidas concretas para conseguir que se restitúan as fórmulas toponímicas legais no apeadoiro ferroviario de Cabanas.

Primeiro, dirixirémonos ao Ministerio de Fomento, de quen depende a empresa pública ADIF, para: a) poñer no seu coñecemento estes feitos; b) informarlle sobre a esixencia legal de que as formas toponímicas legais, e que deben figurar nas marquesiñas, é a galega, e c) solicitarlle a substitución, na rotulación das marquesiñas do apeadoiro de Cabanas, das formas toponímicas deturpadas por aquelas formas legais en galego.

Segundo, dirixirémonos a ADIF, tanto á súa presidencia como ás Direccións Xerais de Planificación Estratéxica e á de Desenvolvemento da Infraestructura, para: a) poñer no seu coñecemento estes feitos; b) informarlle sobre a esixencia legal de que as formas toponímicas legais, e que deben figurar nas marquesiñas, é a galega, e c) solicitarlle que en diante, na súa estratexia empresarial e no deseño das súas infraestructuras, observen escrupulosamente o cumprimento da lei en materia de toponimia.

E terceiro, trasladaremos ao Consello das Linguas Oficiais e á Oficina das Linguas Oficiais, dependentes do goberno central e órganos de cooperación interadministrativa para a construcción dunha política lingüística de Estado, a demanda de cumprir no máis breve prazo a esixencia legal e, por tanto, a obriga de cumprimento ética- da Lei que establece a galega como a forma toponímica propia. Propoñéndolles, ademais, o establecemento dunha única base de datos normalizada e adaptada a esta Lei para todas as administracións do Estado.

A SXPL garántelle á súa señoría, ademais, un seguimento directo desta cuestión, na busca dunha restitución da normalidade lingüística no máis breve plazo, como é a nosa intención e principal anhelo.

Dende Galiza Nova de Cabanas valoramos positivamente esta nova, e agardamos que non quede só nunha declaración de intencións e se poida así restablecer a normalidade no menor espazo de tempo posíbel. Por contra, dende o Concello de Cabanas segue sen haber resposta ao tema.

O Concello de Cabanas desatende as queixas veciñais defendidas por Galiza Nova

2008-09-19T21:32:00.001+02:00

Galiza Nova, organización das mocidades do BNG denunciou no rexistro municipal de Cabanas, mediante solicitude escrita con selo de entrada, o deterioro e abandono dos parques infantís do concello e o emprego da toponimia ilegal no apeadoiro desta localidade.

Segundo Galiza Nova, "presentouse a primeira das nosas queixas, relacionada co estado dos parques infantís o 14 de xullo e a referida ao uso da toponimia Cabañas-Arenal no canto da oficial, o 22 de xullo". Dende a organización xuvenil engadiron que "a día de hoxe, seguimos sen ter unha resposta do Concello, nin observamos que atenderan as nosas peticións".

Aclaran ademais que "mentre o alcalde popular Germán Castrillón permanece cos brazos cruzados, o BNG levou ao seo do Parlamento Galego, a través dos deputados Bieito Lobeira e Fernando Branco, dúas preguntas dirixidas á Secretaria Xeral de Política Lingüística solicitando a avaliación feita pola Secretaría sobre ou uso dos topónimos deturpados en Galiza, e as medidas concretas que se adoptarán no caso de Cabanas para garantir o cumprimento da lei".

Un tren con destino Cabañas

2008-08-27T10:07:00.003+02:00

Recolle hoxe o xornal La Opinión de A Coruña na súa edicción dixital un artigo que titula "Un tren con destino Cabañas", e no que se fai eco da denuncia que dende Galiza Nova fixemos do uso ilegal da toponimia na marquesiña do apeadoiro, cuestión que o BNG elevou ao Parlamento Galego.

Podedes ler o artigo nesta ligazón

Éxito do concerto de Galiza Nova!

2008-08-26T13:17:00.002+02:00

Como vos estivemos comentando dende este blogue e o das compañeiras e compañeiros de Galiza Nova de Pontedeume, o pasado venres 22 celebramos o concerto do 20 aniversario de fundación da organización xuvenil do BNG.

As actuacións musicais dos grupos The Arradios, chegados dende San Sadurniño, e Arenga, de Pontedeume, animaron a toda a mocidade da comarca que se achegou até a Sala Coliseo para desfrutar da música dos dous grupos.

E como cabía esperar, non defraudaron. O público estivo todo o tempo que durou o concerto animado e participando activamente da festa. Mesmo houbo quen se animou a facer os coros!

Dende Galiza Nova queremos agradecer á mocidade da comarca que este concerto fose un éxito, e que supón o primeiro dos actos lúdicos e políticos cos que Galiza Nova celebra o 20 aniversario da súa fundación na comarca!

Galiza Nova de Cabanas solidarízase cos familiares das vítimas do accidente aéreo de Barajas

2008-08-20T20:27:00.003+02:00

Galiza Nova de Cabanas quere manifestar as súas condoenzas ás familias das vítimas do tráxico accidente aéreo desta tarde en Madrid-Barajas, no cal, segundo as últimas informacións, perderon a vida máis de 150 persoas

Acto en San Marcos, 21 de agosto

2008-08-13T10:49:00.002+02:00

Co gallo do aniversario do Mitin de San Marco, en recordo do agrarismo solidario galego de Cabanas, o BNG celebrará unha serie de actos o vindeiro xoves 21 de agosto

ACTO POLÍTICO (Xunto á capela de San Marco).

16.30h. Intervencións dos representantes dos grupos municipais do BNG de Fene e Cabanas

ACTO VECIÑAL (Lavandeira, pavillón polideportivo)

18.40 h APERTURA DAS MESAS. Proxección de vídeos informativos: Unidades de Xestión Forestal e BANTEGAL.

19.00 h MESA RURAL

- Olga Mª García Agra (Delegada da Consellaría de Medio Rural). Avanzando cara a un novo rural galego. Achega de materiais informativos.

- Xoán Carlos Bascuas Xardón (Delegado da Consellaría de Vivenda e Solo). A vivenda, un dereito para tod@s. Achega de materiais informativos.

20.30 h MESA DO EUME

- O río Eume visto polos propietarios e pescadores

Galiza Nova de Cabanas, As Pontes e Pontedeume denuncian a situación do Río Eume

2008-08-11T09:21:00.009+02:00

NOTA DE PRENSA

Desde Galiza Nova queremos pór en coñecemento da mocidade da comarca do Eume a actual situación dos ríos Eume e Chamoselo, da súa morte.

Non somos capaces de entender o pasotismo dos concellos afectados nin o escurantismo que se está crear; a falta de información sobre o que acontece nos nosos ríos. En definitiva, estase a ocultar o desastre ecolóxico que está a ocorrer en As Pontes e que afecta negativamente a tódolos concellos situados ao marxe do Eume.

Uns análises feitos en diferentes partes do río a instancias do grupo de goberno do BNG de As Pontes en maio do 2007, deron como resultado a sospeita de contaminación das augas do río Chamoselo. Ditas análises chegaron ao Concello de As Pontes tras o cambio de goberno, e foron remitidos á Consellaría de Medio Ambiente (PSOE), polo actual grupo de goberno da vila (PSOE), sen ter máis novas ao respecto até a aparición dos reos mortos na zona baixa do río Eume, en Pontedeume, coa conseguinte denuncia da Sociedade de Pescadores de Caaveiro, aló polo 15 de xuño de 2008. A partires desa denuncia van aparecendo novas na prensa dos diarios da comarca que nun primeiro momento desminten calquer relación entre as obras da autovía e o desastre para, 20 días despois, darlle a volta e afirmar que nese problema fica a causa da mortalidade do río, causando a baixada do PH até límites que provocan a non potabilidade da auga para o consumo humano e a morte dos peixes.

Unhas análises feitas por un grupo de pescadores mostran como dende a confluencia do río Chamoselo co Eume, o PH oscila dende 3.4 até 5.0 na cola do pantano e 4.76 no coto de Ombre, cando o normal é preto de 7.0 Compre destacar que o BNG mantivo unha actitude de preocupación neste tema, catalogado como CATÁSTROFE, nos concellos do Eume.

Tamén fixo unha pregunta a través do deputado Fernando Blanco no Parlamento de Galiza, na que salientou que hai un informe de hai máis dun ano elaborado por un laboratorio privado sobre a situación do río.

Dende Galiza Nova de As Pontes, Pontedeume e Cabanas non se entende como se puido manter esa actitude de pasividade ante unha situación de degradación dos nosos ríos, constatada por informes en poder da Administración pública, e consideramos que urxe unha acción decidida e inmediata para pór freo aos verquidos continuados nesa zona, así como a esixencia de claridade das administracións locais e galega e a aplicación de solucións urxentes para devolver a vida aos ríos destruídos.

Agardamos tamén que tras esta catástrofe aparezan os responsábeis. Galiza Nova non vai ficar calada; a mocidade do Eume non pode deixar que se xogue co seu futuro. Todos sabemos a importancia económica e medioambiental dos nosos ríos, e loitaremos por ela.

Así o recolle a prensa

A nova en Radio Voz (11/08/08) (escoita aquí)

A nova en La Opinión (12/08/08) (ler)

A nova en La Voz de Galicia (12/08/08) (ler)

A nova en GZnación (12/08/08) (ler)

A nova en La Opinión (13/08/08) (ler)

Concerto 20 aniversario

2008-08-08T15:43:00.006+02:00

Dende Galiza Nova de Cabanas e Galiza Nova de Pontedeume organizamos para o vindeiro 22 de agosto ás 23.00h un concerto na Sala Coliseo de Pontedeume para celebrar o 20 aniversario da organización xuvenil na comarca de Ferrolterra.

As actuacións correrán a cargo dos grupos The Arradios e Arenga, de San Sadurniño e Pontedeume, respectivamente, sendo a entrada totalmente gratuíta!

Como chegar?

A Sala Coliseo atópase na Rúa dos Ferreiros de Pontedeume. É moi doado dar con ela! Na seguinte imaxe está marcada a súa posición. Para aparcar, o máis sinxelo e procurar un sitio na Avda Ricardo Sánchez ou na Zona Portuaria.

Máis info?

Se desexas máis información, non dubides en poñerte en contacto connosco deixando un comentario nos blogues de Galiza Nova ou enviando un correo electrónico a galizanovacabanas@gmail.com ou gznovapontedeume@gmail.com

Queres o cartaz?

Se queres ter o cartaz, fai clic co botón dereito na seguinte ligazón e selecciona "Gardar como" CLIC CO BOTÓN DEREITO AQUÍ

Descarga un fondo de escritorio conmemorativo dos 20 anos de Galiza Nova!

2008-08-07T17:00:00.004+02:00

Xa podes descargar un fondo de escritorio conmemorativo dos 20 anos de Galiza Nova!

Só tes que clicar co botón dereito na seguinte ligazón, e escoller a opción de "Gardar como..." para descargala!

CLIC AQUÍ CO BOTÓN DEREITO

O BNG eleva ao Parlamento a pregunta sobre toponimia proposta por Galiza Nova de Cabanas

2008-08-06T09:56:00.004+02:00

Fernando Blanco e Bieito Lobeira, deputados do Grupo Parlamentar do Bloque Nacionalista Galego presentaron unha pregunta (solicitando resposta por escrito) en relación co uso de topónimos deturpados no apeadoiro de Cabanas, feito denunciado por Galiza Nova.

O ADIF (Administrador de Infraestructuras Ferroviarias), empresa pública estatal encargada da xestión do tránsito nos camiños de ferro, ven de instalar recentemente no apeadoiro do Concello de Cabanas, unha marquesiña na que figuran en grandes caracteres e nos dous sentidos de circulación os topónimos deturpados "Cabañas" e "Arenal".

É evidente que esta actuación vulnera a legalidade vixente, comezando pola Lei de Normalización Lingüística.

Estas son as razóns que levan ao BNG a formular as seguintes preguntas, para a súa resposta escrita:

1) Que avaliación realiza a Secretaría Xeral de Política Lingüística sobre a utilización de topónimos galegos deturpados por parte de ADIF, no noso propio país?

2) Que medidas concretas se adoptarán para permitir que no apeadoiro de Cabanas se cumpra a legalidade lingüística?

Haberá que agardar agora cal vai ser a resposta do Parlamento de Galiza. Pola súa banda, dende o Concello de Cabanas inda non houbo resposta á pregunta presentada por escrito por parte de Galiza Nova...

Nace www.nsaio.org, un foro de encontro e intercambio arredor dos novos talentos musicais do país

2008-08-05T16:40:00.003+02:00

O director xeral de Xuventude, Rubén Cela, e o director xeral de Creación e Difusión Cultural, Luis Bará, presentaron hoxe en Santiago o novo portal web http://www.nsaio.org/, unha web concibida como foro de encontro e intercambio de experiencias arredor da Rede Galega de Locais de Ensaio e dos grupos noveis de Galiza.

O novo espazo web complementará na internet o labor que se desenvolve desde a Dirección Xeral de Xuventude coa posta en marcha da Rede Galega de Locais de Ensaio. O portal www.nsaio.org estrutúrase arredor dun corpo central deseñado para que os grupos noveis galegos dispoñan da súa propia microweb. Trátase dun espazo autoxestionable que lles permitirá aos grupos e artistas introducir todo tipo de información sobre o seu traballo logo dun sinxelo proceso de alta gratuíta. En cada un dos espazos particulares poderase introducir diversa información: desde os datos do artista ou grupo musical ata vídeos ou arquivos en mp3 para a súa escoita ou descarga, entre outros. Ademais, a alta daralles acceso a un servizo en liña de asesoría xurídica en materia de dereitos, propiedade intelectual e outros aspectos legais relacionados coa actividade musical.

Dentro do portal web haberá tamén un espazo destacado para a información relacionada coa Rede Galega de Locais de Ensaio, promovida pola Dirección Xeral de Xuventude. Cada local en funcionamento disporá do seu propio apartado con información de contacto, localización, normas de uso, datos dos usuarios, novas, eventos en axenda e documentación descargable. Neste apartado tamén se farán visibles as microwebs dos grupos que se adscriban a un determinado local.

Espazo Escoita!

Segundo explicou o director xeral de Xuventude no decurso do acto, outro apartado da http://www.nsaio.org/ estará ocupado pola información e servizos que se ofrecen no marco desta rede de locais de ensaio. Os internautas que se acheguen a este punto poderán coñecer os locais de ensaio en funcionamento e as vindeiras aperturas, así como os grupos que usan estes espazos. A actualidade ocupará tamén un lugar destacado deste apartado, xunto co espazo Escoita!, un novidoso punto no que se poderán escoitar en liña as cancións dos grupos e que os internautas poderán valorar e votar, ademais de descargar ao seu ordenador. Para poder acceder a este apartado de votación aos grupos e cancións favoritos os internautas deberán rexistrarse previamente. Unha vez feito terán acceso ás votacións, á inserción de comentarios e opinións e á descarga da música.

Cómpre salientar que a web acollerá tamén un servizo de radio coñecido como radionsaio, no que os internautas poderán escoitar a música do portal.

Galiza, potencia cultural

Na súa intervención o director xeral de Xuventude afirmou que hoxe por hoxe Galiza é "unha auténtica potencia cultural" e explicou que coa posta en marcha do proxecto Nsaio trátase de abrir unha nova etapa de relación entre o Goberno galego e os novos talentos do país. Así, lembrou que a Rede Galega de Locais de Ensaio é hoxe en día un referente a nivel do Estado, xa que se trata do único espazo do país de carácter público e gratuíto acondicionado de xeito profesional e no que os artistas teñen libre acceso. "Pero Nsaio é moito máis", apuntou Rubén Cela, xa que se trata dunha iniciativa transversal en plena sintonía cos concellos do país e cos grupos e solistas que participan no proxecto.

Pola súa banda, o director xeral de Creación e Difusión Cultural salientou o carácter pioneiro e vangardista desta iniciativa, coa que o Goberno galego dá resposta a unha gran necesidade que había no país no eido musical. Neste punto, avanzou que un dos vindeiros obxectivos do programa é facer que os novos talentos do programa Nsaio teñan acceso aos circuítos culturais do país e que a súa creación acade difusión e presenza pública. Así, apuntou a modo de exemplo as posibilidades que ofrece a Rede Galega de Música ao Vivo como punto de difusión da creatividade galega ao longo de toda a xeografía do país. De feito, un total de 47 salas de programación do país participan nesta iniciativa, que ao longo do 2008 ten programadosarredor de 600 concertos de máis de 80 grupos musicais noveis de Galiza. Ademais, apuntou tamén aos festivais como un importante espazo no que os novos creadores poidan a dar a coñecer o seu traballo ao lado de outros grupos ou solistas xa consolidados. "Vivimos un gran momento para a música galega que dará grandes froitos nos vindeiros anos", manifestou Luís Bará ao peche das súas palabras.

Galiza Nova de Cabanas participa da manifestación do Día da Patria

2008-07-27T01:40:00.002+02:00

Galiza Nova de Cabanas participou onte da manifestación que como cada 25 de xullo percorre as rúas de Santiago para celebrar o Día da Patria, na que se xuntaron máis de 25.000 persoas.

EMISIÓN EN DIRECTO DO DÍA DA PATRIA!

2008-07-24T20:41:00.002+02:00

Se por calquer motivo non puideses asistir este ano á manifestación nacional do Día da Patria Galega que terá lugar mañá polas rúas compostelás, o BNG émitirá en directo a partires das 13.00h dende a Praza da Quintana os discursos de Iria Aboi, Secretaria Xeral de Galiza Nova, e de Anxo Quintana, Voceiro Nacional do BNG.

CLIC AQUÍ PARA VE-LO

Homenaxe a Rosalía e Castelao

2008-07-23T09:43:00.003+02:00

Galiza Nova organiza no Panteón dos Galegos Ilustres, en San Domingos de Bonaval (Compostela), un acto homenaxe a Castelao e Rosalía.

A homenaxe, que terá lugar a partires das 17.30h, contará coas intervencións de Iria Aboi, Secretaria Xeral de Galiza Nova, e Francisco Rodríguez, ex-Deputado no Congreso do Estado e Responsábel de Acción Institucional na Executiva do BNG

Agardamos contar coa túa presenza!

Galiza Nova de Cabanas pregunta pola toponimia

2008-07-23T09:29:00.002+02:00

Galiza Nova de Cabanas presentou onte no rexistro municipal un texto dirixido ao alcalde na que se preguntaba pola instalación da nova marquesiña que RENFE instalou no apeadoiro de Cabanas-Areal.

Nesa marquesiña de nova instalación, estase a empregar ilegalmente a toponimia en español, xa que tanto a Lei de Normalización Lingüística coma dous decretos aprobados posteriormente (pódese atopar máis información ao respecto clicando aquí) establecen que a a única forma legal da toponimia de Galiza é a galega.

Agardemos que o concello esixa ás autoridades competentes a reparación dese erro grave, asi como tamén que vele polo cumprimento da lei no ámbito toponímico

Nunca tal se viu!

2008-07-20T17:41:00.000+02:00

Iago Varela, novo Responsábel Comarcal de Galiza Nova

2008-07-18T15:13:00.006+02:00

Galiza Nova, organización das mocidades do BNG, e organización maioritaria do nacionalismo xuvenil galego, presentou esta mañá no local comarcal do BNG de Ferrol ao novo Responsábel Comarcal de Galiza Nova, Iago Varela Martínez, un mozo de 22 anos de Cabanas, que foi elixido para desempeñar tal cargo na asemblea que a formación nacionalista celebrou o pasado luns.

Iago Varela, que estivo acompañado do Responsábel Comarcal de Organización, Marcos Sánchez, destacou o traballo de Galiza Nova na comarca na defensa do sector naval (Plan Ferrol, que supuña a volta de ASTANO á construcción naval civil).

A nivel local, Varela precisou que Galiza Nova conta na comarca con “presenza activa” en concellos coma Narón, Ferrol, As Pontes, Pontedeume, Cabanas, Cerdido e Cedeira, e engadiu “o obxectivo que nos marcamos, é o de seguir ampliando a nosa base social, para poder incidir en maior medida na vida política da comarca, en beneficio da mocidade”.

En palabras do novo Responsábel Comarcal, “O cambio no goberno galego supuxo unha renovación nas políticas xuvenís, que por primeira vez foron feitas con, e para a mocidade”. Varela pensa que “en Ferrolterra é preciso acadar unha maior implicación dos concellos na ampliación de espazos para uso xuvenil, na mellora do transporte inter e intramunicipal, nas políticas de lecer, nas participativas, etc.”.

Galiza Nova comeza pois unha nova etapa na comarca, que nun futuro inmediato vai estar marcado polo 20 aniversario da formación, motivo polo cal se organizarán distintas actividades (charlas, concertos...).

Os mozos do BNG informaron, asimesmo, da súa participación activa no Festigal e na manifestación do Día da Patria.

Podes escoitar unha parte das súas declaracións AQUÍ.

Galiza Nova pregunta polo estado dos parques infantís

2008-07-14T11:06:00.003+02:00

Galiza Nova de Cabanas entregou hoxe no rexistro do Concello de Cabanas un escrito dirixido ao alcalde, o popular Germán Castrillón, no que se da conta do estado de abandono que sofren os distintos parques infantís do Concello.

Porén, dende Galiza Nova de Cabanas esíxese que se repare de inmediato os desperfectos, co fin de garantir a seguridade dos meniños que usan eses parques, así como tamén o establecemento de visitas periódicas de persoal laboral do concello, para velar pola limpeza e o bo estado das instalacións.

Festigal: 24 horas de música, tendencias e diversidade en Galiza

2008-07-11T17:56:00.005+02:00

Dende Galiza Nova de Cabanas queremos facer especial fincapé no Festigal, que este ano volverá a tinguir as rúas compostelás de música, animación, conversas.. e moito máis!

Froito do esforzo levado a cabo por Galiza Nova e a Fundación Galiza Sempre, a programación que terá lugar os días 24 e 25 de xullo no Campus Sur de Santiago é a seguinte:

-Concertos musicais

24 de xullo, dende as 23.00h: Nao, Caravan Palace, Lamatumbá e The International Noise Conspiration.

25 de xullo, dende as 21.00h: Victor Aneiros Band. Quempallou, Pablo Milanés e Berrogüetto.

-Zona xantar

Postos para xantar e cear ámbolos dous días, con oferta gastronómica variada

-Galería do Software Libre

Asociacións ao teu dispór os dous días para saber máis e resolver as túas dúbidas sobre software libre. Ademáis

25 de xullo ás 19.30h Presentación de AINFOVAC, programa de software libre de apio ao emprendemento feminino e ao desenvolvemento do rual, resultado do traballo de tres departamentos nacionalistas da Xunta: O Servizo Galego de Igualdade e Benestar, Medio Rural e Industria

-Galería de Ideas

Xoves 24..

... ás 13.00h "Centenario de Curros Enríquez", con María Xosé Bravo, Xosé Maneul Carril, Francisco Rodríguez, Marica Campo e Manuel Rei Romeu

... ás 17.00h "Neoliberalismo e crise: na procura de alternativas", con Eva Fuentes (xornalista de GZnación), Olaia Fernández Dávila, Xavier Vence e Gustavo Quilaqueo (Partido Nacionalista e Autonomista Mapuche)

... ás 19.30h "3 anos de Goberno, 3 anos de cambio transformador", con Ana Rodríguez (moderadora), Tareixa Táboas, Alfredo Suárez Canal e Antonio Sangiao (director de Xornal.com)

Venres 25...

... ás 18.00h "20 aniversario de Galiza Nova", con Bieito Lobeira, Martiño Santos, Antelo, Rubén Cela, Ana Pontón, Xosé E. Vicente e Iria Aboi

-Galería das Letras

Librarías: Andel do libro (Vigo), A palabra perduda (Santiago) e Pedreira (Santiago)

Editoriais: OQO, Rinoceronte, Urco, A Nosa Terra, Galaxia, Xerais de Galicia, Lonxa Cultural

Asinatura de libros polos autores/as ao remate da presentación. Rosa Aneiros e Teresa Moure asinarán os seus libros durante os dous días

Xoves 24...

... ás 11.00h Apertura

... ás 17.00h Presentación "Monográficos sobre diversidade funcional", da Revista Galega de pensamento feminista ANDAINA, con Estrela Vilaverde e Isabel Lodeir

... ás 17.45h Presentación do libro "Premio novela erótica" da Editorial Positivas

... ás 18.30 Recital de poesía

... ás 19.15h Presentación do "Atlas histórico de Galiza", da editora Ediçoes da Galiza, por Artur Alonso Novelle, Heitor Rodal e José Manuel Barboase e José Manuel G. Rivera

...ás 20.00h Presentación do libro "Cantos e fragmento de safo", tradución e Raúl Gómez Pato. Falará o propio Raúl e Francisco Macías.

... ás 20.45h Entrega de premios do "1º campionato Día da Patria Galega de Trivial.gz"

Venres 25...

... ás 16.30h Presentación do libro "Galiza na Unión. A porta Atlántica", de Camilo Nogueira na editorial Galaxia, con Suso de Toro e Camilo Nogueira

... ás 17:15h Presentación da edición en galego de "O segundo sexo" de Simone de Beauvoir na editorial Xerais de Galicia. Falará: Carmen Adán, Secretaria Xeral de Igualdade da Vicepresidencia da Xunta de Galicia.

... ás 18:00h Recital de poesía: Marta Dacosta, Paco Souto...

... ás 18:45h Presentación do libro "Os Grouchos" de Manuel Rivas con Manuel Bragado, director xeral de Edicións Xerais de Galicia e Manuel Rivas, autor

... ás 19:30h Presentacion do "Decálogo que a língua galega precisa" da Fundación Bautista Álvarez. Falarán Bautista Álvarez, presidente da Fundación, Pilar García Negro, autora e Xoan Carlos Garrido, autor.

... ás 20:15h Presentación do libro "Os piratas da illa da Esperanza" na editorial Xerais de Galicia. Falará: X. H. Rivadulla Corcón, autor.

... ás 21:00h Presentación do libro "Os efectos do afundimento do Prestige" na editorial A Nosa Terra. Falarán:· Mª do Carme García- Negro, directora. Adolfo Carballo Penela e Carlos Sebastián Villasante.

-Galería de audiovisual

(Na Sala Nasa)

Xoves 24...

... ás 11.00h Apertura· TECENDO O FÍO DA MEMORIA (2006) (María Reimóndez Meilán), CICLO COMBINADO (2006) (Sabela Pernas Soto, Nuria Castro Prieto), AREA NOS OLLOS. A LOITA POR BALDAIO 30 ANOS DESPOIS (2007) (Iván Seoane Romero), A GUERRA DOS AVÓS (2007)(Oscar Galansky López), LOBOS SUCIOS (2006) (Felipe Rodríguez Lameiro), O MUNDO POLAS MANS (2006) (Placido Baranda Valeiras, Mónica Cortés), PÓ DE ESTRELAS (2007) (Alberte Pagán), COUSAS DO KULECHOV (2006) (Susana Rei Crespo), LONGO SENDEIRO DE PEDRA (2006)(Pablo Millán). LEO (2007) (Fernando Cortizo Rodríguez), HOMELESS, SEN TEITO (Diego Méndez Lamas), A REVOLTA DOS MOUSES (2007) (David Alejandro Gen), DON SEÑOR E O HOME DO SOÑO (2007)(Nacho Abia Carrera), 1977 (2007)(Peque Varela), BATA POR FORA (muller por dentro) (2007)(Claudia Brenlla López), ESQUECIDAS (2007) (Luqui Matthews), XAN, A DESPEDIDA (2007)(José Luis Martínez Díaz), PERVERSA LOLA (2007) (Sonia Méndez Alonso) e 1, 2, 3 RODANDO (Olaia Sendón)

-Galería de Cultura Tradicional

Espazo da cultura tradicional. Asociación de gaiteiros galegos.

Xoves 24...

... ás 11:00h Apertura: Mostra de Instrumentos Tradicionais, Mostra de Traxes Tradicionais, Mostra do 20 aniversario da AGG, Mostra de Xoguetes Tradicionais Galegos

... ás 13:00h Actuación de Tinta Femia

... ás 15:00h Actuación de Tinta Femia

... ás 17:00h OBRADOIROS: Xoguetes Tradicionais, Construción de Xoguetes Sonoros

... ás 19:00h OBRADOIRO Xogos de Baile Tradicional

... ás 20:00h Música tradicional

... ás 21:00h Peche do Espazo da Cultura Tradicional

Venres 25

... ás 13:00h Actuación de "A Requinta da Laxeira"

... ás 15:00h Apertura: Mostra de Instrumentos Tradicionais, Mostra de Traxes Tradicionais, Mostra do 20 aniversario da AGG, Mostra de Xoguetes Tradicionais Galegos

... ás 15:00h Actuación de A Requinta da Laxeira

... ás 17:00h OBRADOIROS: Xoguetes Tradicionais, Construción de Instrumentos Vexetais

... ás 18:30h Exhibición de Loita Galega

... ás 19:00h OBRADOIRO Iniciación ao baile tradicional

... ás 20:00h Música tradicional

... ás 21:00h Peche

-Asociacións, Artesanía e Tendas

Feira de Asociacións

Postos con material de asociacións, ONGs e colectivos diversos: Maarcha Mundial das Mulleres, Comités Novas de Galiza, Igadi, Movemento polos Dereitos Civís, Isca, Movemento Pola Base, Fundación Federico Engels, CIG, FORGA, AS-PG, A Mesa pola Normalización Lingüística, Fundación Vía Galego, Fundación Bautísta Álvarez, GZnación, EMUGA, BNG, Galiza Nova, Fundación Galiza Sempre, Foro Social Galego

Galería Artesanal. Exposición e venda de artesanía galega. Produtos galegos. Oficios e instrumentos tradicionais.

· María Carmen Oca Aguiar:Coiro

· Eduardo Escalante Ruíz: Óso

· Laura Perez Quintiana: Vidro fundido

· Marilene: Artesanía do Brasil

·Puntosalvo: Prendas de punto e complementos

· Moncho Sánchez: Prata

· Gal: Artesanía do Brasil

· Cristina García Vieiro: Coiro, sementes macramé, ganchillo

· Martín Morales: Madeira

· Claudio García: Material reciclado, lámparas

· Elena Ferro: Zocos e coiro

· Iago Canda: Prata e macramé

· Santi Bernárdez

· Mónica Martínez del Valle

· tendagaliza.com: Obradoiro Trebopala, Museo do Coiro de Allariz

· Raquel Patiño: Coiro

· Marta Gómez Ocampo: Artesanía ecolóxica

· Cristina Castro Lorenzo: Coiro, malabares, xogos chinos, licor caseiro

· Maica Novo: Roupa de seda da India

· Óscar Montoya Álvarez: Prata

· Patapún: Roupa teñida

-Maxia

Xoves 24...

... ás 21:30h Espectáculo de Maxia: Magos no País das Marabillas

Venres 25...

... ás 20:30h Espectáculo de Maxia: Magos no País das Marabillas

-Exposicións permanentes

24 e 25 de Xullo.

O Himno, os tempos son chegados

Curros Enríquez, Nación, Liberdade e Progreso.

Mantente á última en http://www.festigal.com/

Festigal'08

2008-07-04T18:18:00.002+02:00

O Festigal 2008 xa está a chamar ás nosas portas, e este ano ven chegar cun cartel de impresión!

Entre os artistas que este ano se darán cita no Campus Sur de Santiago estarán

Xoves 24

Nao

Caravan Palace

Lamatumbá

The Internationali Noise Conspiracy

Venres 25

Victor Aneiros Band

Pablo Milanés

Berrogüetto

A festa xa comeza!

Galiza Nova participa nos actos do Día do Orgullo LGTB'08

2008-06-30T21:58:00.002+02:00

Galiza Nova estavo este sábado na manifestación que percorreu as rúas da capital de Galiza con motivo do día do orgullo LGTB 08.

Esta manifestación que saiu ás 18:00h da alameda compostelana estivo convocada pola federación Aturuxo que agrupa ás diferentes organizacións de lesbianas, gais, transexuais e bisexuais de Galiza.

Ademais desta manifestación tamén houbo ás 13:00 un Maripicnic-Foliada no Parque de Belvis (Barrio de S. Pedro) e ao remate da manifestación ás 22:30 unha festa concerto na Praza da Quintana con Alive, Opperetta Mix, La Kinky Beat.

Posición do BNG ante o Tratado de Lisboa

2008-06-27T20:57:00.002+02:00

Falouse moito estes días do Tratado de Lisboa. Dende Galiza Nova de Cabanas queremos facervos chegar as razóns do NON do BNG a dito tratado:

A) CUESTIÓNS PREVIAS:

As Cortes Xerais do Estado debaten o Tratado de Lisboa, asinado na capital portuguesa o 13 de decembro de 2007 polos Xefes de Estado ou de Goberno dos 27 estados membros da Unión. Este Documento modifica o Tratado da Unión Europea e o Tratado Constitucional da Unión Europea.

Este proceso realizado exclusivamente pola vía parlamentar, é froito dun acordo adoptado durante a Presidencia Alemana co que se pretende retomar a mal chamada “Constitución” Europea.

Ante este debate o BNG defende, en coherencia coas resolucións adoptadas na XI Asemblea Nacional (2003) e no Programa para as eleccións ao Parlamento Europeo (2004), unha posición, tendo en conta o contido do Tratado, contraria á ratificación do mesmo.ç

B) AS RAZÓNS DA OPOSICIÓN DO BNG Á RATIFICACIÓN DO TRATADO:

1. O deficit democrático

O procedemento seguido escapando do referendo, en base a diversos pretextos, revela o medo ao sentido de voto dos cidadáns europeos. Saben que o contido do “Tratado de Lisboa” é a copia da referida constitución europea, á que mudaron o nome para tentar de enganar á poboación europea, o que representa un auténtico fraude político.

No que atinxe á arquitectura institucional, o Tratado de Lisboa reforza os poderes da Comisión (o executivo da UE) en detrimento do Parlamento.

O empobrecemento da democracia tamén é visíbel na Carta dos Dereitos Fundamentais, máis restrinxida, aínda, que a estabelecida no Tratado Constitucional.

2. O deficit de soberanía: O esquecemento da europa dos pobos

O “Tratado de Lisboa”, esixe o respecto á “integridade territorial” de cada Estado, polo que a a plasmación práctica do dereito de autodeterminación queda impedido.

O “Comité das Rexións” ao sumo non pasa dunha cifra de “representantes rexionais” que expresan o peso político dos estados membros da Unión sen atender a articulación territorial e institucional de cada un deles conforme a criterios dunha mínima democracia.

O Tratado de Lisboa consolida unha estructura de poder baseada na combinatoria de estados xerarquizados, coa mudanza no procedemento de adopción de moitas decisións, que lle outorga aos estados centrais un papel determinante.

O proceso de construción da UE é a concreción en Europa da dialéctica mundialización-rexionalización, antitética ás formulacións do nacionalismo galego.

O Tratado de Lisboa representa un paso atrás no recoñecemento na esfera internacional da lingua galega. As únicas linguas oficiais son as dos estados, estabelecéndose unha división ou xerarquización entre as mesmas atendendo unicamente a criterios políticos administrativos. Isto é, o elemento para determinar a visibilidade dunha lingua é o Estado; é dicir, o corsé estatal determina a existencia ou non dun idioma.

3. Unha política económica ao servizo do capital

No contido do Tratado institucionalizase a Estratexia de Lisboa e o Pacto de Estabilidade insistindo nas políticas que están a ser practicadas, con consecuencias xa coñecidas: recortes nos salarios reais e nas pensións, menores investimentos nos servizos públicos e maiores ganancias para os grupos económicos.

Por outra banda, convén lembrar que, mália o que digan os defensores da UE, Galiza non recibiu tantos fondos europeos. Do total de recursos comunitarios destinados ao Estado Español, entre 1986 e 2006, a porcentaxe galega non pasou do 6%, inferior ao seu peso poboacional no conxunto do Estado.

O “Tratado de Lisboa” vai fixar competencias exclusivas ou compartidas cos Estados, socavando a capacidade de planificar ou intervir na economía pola diferentes nacións ou estados, o que fará inviábel que se poida enfrentar unha situación como a da actual crise económica ao servizo dos pobos e da maiorías sociais.

O Tratado vai deixar en mans da Comisión a política enerxética, a de transporte e a comercial común, o que afondará nas desigualdades rexionais no espazo comunitario.

4. Un retroceso nos dereitos sociais

O “Tratado de Lisboa” significa un novo avance no ataque aos dereitos laborais, poñendo en cuestión o despedimento sen causa xusta, a negociación colectiva ou a limitación horaria da xornada laboral, da que é claro exemplo a directiva que promove a ampliación da xornada laboral semanal a 65 horas.

O dereito ao traballo e ao emprego non existen, simplemente aparece o “dereito a traballar”. O dereito á protección social é substituído por un mero “dereito de acceso ás prestacións da seguranza social e aos servizos sociais”.

Por outra banda, o Tratado non recoñece o dereito ao aborto e á anticoncepción.

Así mesmo, a UE sitúase á cabeza do mundo en represión en materia de inmigración nunha dirección contraria aos dereitos humanos.

5. A concepción dunha europa subalterna

O Tratado de Lisboa non deixa dúbidas sobre a natureza do modelo europeo e do seu carácter subalterno e complementario ao bloque norteamericano, actuando como unha mera sucursal do proxecto político estadounidense.

Un exemplo palpábel deste papel subalterno é a nova formulación que se fixa en Lisboa, que estabelece que a Organización do Tratado do Atlántico Norte “para os Estados que son membros desta organización, continúa a ser o fundamento da súa defensa colectiva e a instancia apropiada para a concretizar”.

C) A POSICIÓN DO BNG: A DEFENSA DUN MODELO DE CONSTRUCIÓN EUROPEA ALTERNATIVO.

En coherencia co seu programa estratéxico e o seu proxecto nacional, o BNG propugna unha Unión Europea defensora dunha política que preserve a democracia, a economía sustentábel como obxectivo, a sociedade do benestar como elemento de xustiza social e a relación en pe de igualdade entre os gobernos nacionais como expresión das demandas dos pobos. Unha democracia que afortale a capacidade de control e impulso das institucións elixidas democraticamente, respectando as competencias dos Parlamentos nacionais, entre eles o Parlamento de Galiza, incrementando a transparencia na toma de decisións, e corrixindo o déficit democrático existente nas institucións da Unión Europea.

O BNG defende unha Unión Europea participativa, plenamente democrática, baseada na integración e non na exclusión, como conxunto e suma das identidades nacionais e do respecto á pluralidade económica, cultural e lingüística. Unha Unión Europea dotada de mecanismos e garantías de participación política, baseada na paz, na defensa do medio ambiente e no dereito ao traballo digno. Unha Unión Europea dos pobos, na que se recoñezan os dereitos de Galiza como nación. Unha Unión Europea política, social e cultural, e non só económica e monetaria.

En síntese, é hora de mudar o curso do proceso europeo, de pór a economía ao servizo das persoas, de atopar un encadre no continente para as nacións sen estado, de artellar estratexias que contribúan a construír un mundo multipolar, de espertar esperanzas. Non se trata dunha mera construción doutrinal. Ao pobo galego, á maioría social de Europa e do mundo, vailles a vida nisto, por todo isto, o BNG non pode apoiar a ratificación do Tratado de Lisboa porque non contribúe á construcción desa Europa pola que traballamos.

Acto: Cremos no noso Pais

2008-06-15T19:46:00.003+02:00

O BNG de Cabanas celebrará o vindeiro venres 20 de xuño ás 20.00h no Hotel Sarga un acto enmarcado dentro da campaña que o Bloque Nacionalista Galego está a levar a cabo a nível nacional.

No acto de Cabanas, participarán Xosé Manuel Sardiña, Voceiro do Grupo Municipal do BNG no Concello de Cabanas, Ana Rúa, Directora Xeral de Comercio e Alberte Ansede, Secretario de Organización na Executiva do BNG.

Agardámoste!

Vai de camiño 2008

2008-06-01T15:42:00.000+02:00

2ª parte do curso "Portugués para nós"

2008-05-29T18:26:00.002+02:00

Como saberás, a Dirección Xeral de Xuventude e Solidariedade ten en marcha un curso interactivo de portugués para galegos a través de Internet , Portugués para nós, no que calquera se pode matricular de balde.

Dende hai uns días está xa dispoñíbel a 2ª parte de dito curso, con novos contidos para seguir avanzando no coñecemento do portugués.

Ademais, compre recordar que a quen finalice a primeira parte do curso antes do 15 de xuño se lle enviará o diploma acreditativo e entrará nun concurso dunha fin de semana en Lisboa.

Podes acceder ao curso dende aquí.

O PP non respeita o topónimo "Cabanas"

2008-05-24T17:12:00.004+02:00

Sen entrar a dicir nada sobre o non apoio do PP de Cabanas (xunto con AEC e IVC) ao manifesto Polo dereito a vivirmos en galego do que moito temos falado estes días atrás, agora resulta que na propia web do PP de Galiza non respetan nin tan sequera a toponimia legal do País, usando a forma "castelanizada" do nome do noso concello: Cabañas.

Así, na sección de historia (podedes ampliar a imaxe facendo clic nela), aparece que un dos congresos locais do PP da provincia de A Coruña tivo lugar en "Cabañas, en febreiro de 2008".

Dende Galiza Nova de Cabanas entendemos este xesto como unha falta de respeto ao noso idioma e ao noso concello, polo que poremos todo o noso empeño en correxir ese erro grave.

EDITADO: Máis sobre o galego en Cabanas {clic aquí}

Manifestación 18 de maio

2008-05-23T13:48:00.003+02:00

Xa podedes disfrutar dun vídeo da manifestación do 18 de maio e das fotos!

Para ver as fotos, só tes que facer clic aquí.

II concurso de fotografía IGBT Aturuxo

2008-05-20T18:11:00.003+02:00

Neste concurso poderán concorrer tódalas persoas nadas ou residentes en Galiza e que sexan maiores de 16 anos en data 31 de decembro de 2008.

O tema será Existo, por que non me ves? Muller, lésbica, visíbel. Cada autor/a poderá concursar cunha soa obra de fundamento fotográfico realizada en calquera tipo de técnica e soporte. As medidas non superarán os 80x80 cm.

Na primeira fase do concurso, o xurado seleccionará as fotografías sobre a documentación achegada.

O prazo é até as 13.00 h do 2 luns de xuño, e entragarase unha fotocopia do carné de identidade, declaraciíon de residencia (só no caso de que no D.I. figure un lugar de nacemento/enderezo fóra de Galiza), enderezo postal, correo electrónico e teléfono(s) de contacto, nome artístico ou pseudónimo co que desexa figurar nos elementos sinalécticos, unha reproduccuón da obra que se presenta nun CD indicando a posición, ficha técnica completa da obra (título, data, técnica, medidas), texto explicativo da peza seleccionada,valoración económica da obra a efectos de seguro no seguinte enderezo:

Centro Quérote (Concurso Igtb Aturuxo)

Casa da Xuventude

Praza do Matadoiro s/n

15703, Santiago de Compostela

Prazo para matriculación nas Galescolas

2008-05-20T18:03:00.003+02:00

Vense de anunciar que o prazo para a formalización da matrícula nas Galescolas (escolas infantís de 0-3 anos) para o curso 2008/09 será entre os días 1 e 10 de xuño na escola na que obtiveron praza.

Mara máis información, non deixes de visitar a web das Galescolas.

Galiza Nova de Cabanas polo dereito a vivirmos en galego!

2008-05-19T11:07:00.002+02:00

Galiza Nova de Cabanas participou onte na cidade de Santiago na manifestación convocada pola Mesa pola Normalización Lingüística baixo o lema Polo dereito a vivirmos en galego, e que levou á rúa a milleiros de persoas que, desafiando a choiva percorreron ás rúas compostelás en defensa da lingua e das agresións que está a sufrir esta.

O ambiente festivo caracterizou esta manifestación, cuxo manifesto foi apoiado por preto de 500 asociacións.

Campaña do galego en Cabanas

2008-05-19T10:58:00.003+02:00

Galiza Nova de Cabanas e Pontedeume realizaron conxuntamente unha pegada de cartaces da campaña Por que lle tes medo ao galego? Atrévete! en ambas vilas, enmarcados na campaña de lingua que Galiza Nova está a levar a cabo por todo o País.

Ademais, complementouse a pegada co reparto de autocolantes e dípticos nos principais lugares de afluencia de mocidade de ambos concellos, así como tamén coa elaboración dun mural en Pontedeume co lema "Pontedeume en galego. Temos dereito".

Podedes ler o contido destes dípticos nunha entrada deste blogue anterior, clicando aquí.

Poesía fronte á iñorancia

2008-05-17T09:16:00.002+02:00

DEITADO FRENTE AO MAR

Lingua proletaria do meu pobo

eu faloa porque si, porque me gusta

porque me peta e quero e dame a gana

porque me sae de dentro, alá do fondo

dunha tristura aceda que me abrangue

ó ver tantos patufos desleigados,

pequenos mequetrefes sen raíces

que ó pór a garabata xa non saben

afirmarse no amor dos devanceiros,

fala-la fala nai,

a fala dos abós que temos mortos,

e ser, co rostro erguido,

mariñeiros, labregos da linguaxe,

remo e arado, proa e rella sempre.

Eu faloa porque si, porque me gusta

e quero estar cos meus, coa xente que sufren longo

unha historia contada noutra lingua.

Non falo prós soberbios,

non falo prós ruíns e poderosos,

non falo prós finchados,

non falo prós estupidos,

non falo prós valeiros,

que falo prós que aguantan rexamente

mentiras e inxusticias de cotío;

prós que súan e choranun pranto cotián de volvoretas,

de lume e vento sobre os ollos núos.

Eu non podo arredar as miñas verbas de

tódolos que sufren neste mundo.

E ti vives no mundo, terra miña,

berce da miña estirpe,

Galicia, doce mágoa das Españas,

deitada rente ó mar, ise camiño...

Longa noite de pedra - Celso Emilio Ferreiro

Blogues pola lingua

Acto do BNG de Cabanas polo Día das Letras

2008-05-15T19:45:00.002+02:00

Como saberás, o sábado 17 celébrase o Día das Letras Galegas, que este ano vai adicado a Xosé María Álvarez Blázquez.

Para celebrar este día en honor ás nosas letras, o BNG de Cabanas celebrará un acto ás 12.00h diante da estatua de Rosalía de Castro, no colexio das Viñas. Para saber onde é fai clic aquí.

Está o galego en crise?

2008-05-14T18:47:00.004+02:00

O xornal GZnación, co gallo da manifestación que convoca A Mesa para este domingo, reuniu nunha sala a Iria Aboi, Secretaria Xeral de Galiza Nova, Loli Rodríguez Amoroso, Secretaria Xeral de Xuventudes Socialistas e a María Seoane, Presidenta de Novas Xeracións, para falar sobre a situación do galego

Podes escoita-las declaracións de Iria Aboi facendo clic aquí.

Autobús comarcal á manifestación do domingo

2008-05-13T20:12:00.002+02:00

Como saberás, este domingo celebrarase en Compostela o gran acto cívico Polo dereito a vivirmos en galego, que convoca A Mesa Pola Normalización Lingüística.

Para facilitar a asistencia á manifestación, establecerase un servizo de autobuses de balde dende tódalas comarcas do País.

En Ferrolterra, o autobús sairá ás 10.30 h do Teatro Jofre (Ferrol). Para máis información, deberedes chamar ao teléfono 981.364.058

A Nova Organización do Estudantado Galego

2008-05-09T18:36:00.003+02:00

Mañá sábado, 10 de maio, celebrarase na cidade de A Coruña a Asemblea Nacional Constituínte da Nova Organización do Estudantado Galego.

Esta iniciativa nace a partires das organizacións estudantís CAF-CAEF e CAE, sumándose nunha soa forza o estudantado do ensino medio e o universitario, para acadar unha maior incidencia.

Galiza Nova estará presente na clausura do acto, que leva por lema "Organizando o estudantado de hoxe para a Galiza de mañá"

Actos previos á manifestación

2008-05-08T19:03:00.003+02:00

A Asociación Cultural Medulio, co fin de impulsa-la asistencia á gran manifestación nacional en prol do galego do día 18 de maio en Compostela, realizará na vindeira semana os seguintes actos:

Luns, 12 de maio, ás 20.00h no Salón de Actos da Escola Oficial de Idiomas de Ferrol: audiovisual O decálogo que a lingua precisa, caderno activo da Fundación Bautista Álvarez, coa intervención de Pilar García Negro, profesora da Universidade de A Coruña, especialista en sociolingüística e pedagoxía da lingua galega

Venres, 16 de maio ás 20.00h no Salón de Actos da Escola Oficial de Idiomas de Ferrol: espectáculo poético-musical "Manuel Curros Enríquez: a lingua do futuro será o galego", a cargo do grupo de teatro da Asociación

Acto: a situación lingüística de Galiza

2008-05-02T14:04:00.003+02:00

Dentro da campaña previa á gran manifestación nacional do vindeiro 18 de maio en Compostela, baixo o lema Polo dereito a vivirmos en galego, o vindeiro venres, 9 de maio ás 20.00h na Casa da Cultura de Neda, vai ter lugar un acto comarcal sobre a situación actual do idioma, no que intervirá o profesor e membro da Executiva Nacional, FRANCISCO RODRÍGUEZ.

Agardamos contar coa túa presenza!

Galiza Nova de Cabanas participa da manifestación do 1º de maio de Ferrol

2008-05-02T10:53:00.003+02:00

Galiza Nova de Cabanas participou onte da manifestación convocada pola CIG en Ferrol, enmarcada dentro das celebracións polo Día Internacional da Clase Obreira.

Na mesma, repartíronse panfletos e autocolantes, co lema "A mocidade galega polo emprego digno!"

Podedes ver algunhas imaxes do acto clicando aquí

1º de maio. Día Internacional da Clase Traballadora

2008-05-01T14:21:00.003+02:00

Un ano máis conmemoramos o 1º de maio, día do internacionalismo proletario. Unha data máis que importante na que recordamos as loitas de moitas e moitos traballadores en todo o mundo e tamén en Galiza por unhas condicións laborais dignas e na que tamén ollamos a situación na que nos atopamos actualmente.

Neste período estamos a asistir a unha das maiores crises económicas do sistema que está asfiiando a milleiros de pobos do mundo e que está a ter xa as súas consecuencias tamén no noso país.

Dende hai tempo en Galiza padecemos os salarios e as prestacións sociaais máis baixas de todo o Estado Esapñol, unahs condicións de traballo cada vez máis precarias e a carestía da vida vai en aumento. Esta situación especialmente negativa aín´da é máis dura entre as mozas e mozos galegos. Na Galiza seguimos tendo que falar a emigración de mozas e mozos na busca dunhas condicións laborais dignas, seguimos a padecer uns índices de paro, temporalidade e precariedade laboral alarmantes que se están a agravar coa situación económica actual. Así mesmo, continuamos sen visualizar un cambio de rumbo claro por parte da Consellaría de Emprego con propostas acaídas para mellorar as condicións de traballo das galegas e galegos esquecéndose dos indicadores que evidencian que a situación non é positiva e que pode empeorar moito máis.

Agora coa pantasma da crise como consecuencia dun modelo económico baseado no incremento dos beneficios dunhs poucos a costa das e dos traballadores, fortemente especulativo (burbulla inmobiliaria, expansión do sector servizos, ... ) preténdeseos aplicar inda máis "flexibilidade" ou precariedade laboral e aínda máis "contención salariall", ou o que é o mesmo: ningunha mellora ou incremento salarial.

Por todo isto, dende Galiza Nova, organización xuvenil do BNG, defendemos unhas condicións laborais dignas para as mozas e mozos e para a clase traballadora no seu conxunto e cremos que debe haber unha reorientación tanto nas políticas económicas do goberno do Estado Español como nas que aplica a Consellaría de traballo en Galiza.

Neste sentido, dende Galiza Nova estamos dispostos a ofrecer alternativas a esta situación para que as mozas e mozos galegos melloremos as nosas condicións de traballo, e para isto precisamos tamén da túa axuda. Por todo isto, animámoste a que te sumes a nós. Porunhas condicións laborais dignas para a mocidade galega