Nace www.nsaio.org, un foro de encontro e intercambio arredor dos novos talentos musicais do país

O director xeral de Xuventude, Rubén Cela, e o director xeral de Creación e Difusión Cultural, Luis Bará, presentaron hoxe en Santiago o novo portal web http://www.nsaio.org/, unha web concibida como foro de encontro e intercambio de experiencias arredor da Rede Galega de Locais de Ensaio e dos grupos noveis de Galiza.

O novo espazo web complementará na internet o labor que se desenvolve desde a Dirección Xeral de Xuventude coa posta en marcha da Rede Galega de Locais de Ensaio. O portal www.nsaio.org estrutúrase arredor dun corpo central deseñado para que os grupos noveis galegos dispoñan da súa propia microweb. Trátase dun espazo autoxestionable que lles permitirá aos grupos e artistas introducir todo tipo de información sobre o seu traballo logo dun sinxelo proceso de alta gratuíta. En cada un dos espazos particulares poderase introducir diversa información: desde os datos do artista ou grupo musical ata vídeos ou arquivos en mp3 para a súa escoita ou descarga, entre outros. Ademais, a alta daralles acceso a un servizo en liña de asesoría xurídica en materia de dereitos, propiedade intelectual e outros aspectos legais relacionados coa actividade musical.

Dentro do portal web haberá tamén un espazo destacado para a información relacionada coa Rede Galega de Locais de Ensaio, promovida pola Dirección Xeral de Xuventude. Cada local en funcionamento disporá do seu propio apartado con información de contacto, localización, normas de uso, datos dos usuarios, novas, eventos en axenda e documentación descargable. Neste apartado tamén se farán visibles as microwebs dos grupos que se adscriban a un determinado local.

Espazo Escoita!

Segundo explicou o director xeral de Xuventude no decurso do acto, outro apartado da http://www.nsaio.org/ estará ocupado pola información e servizos que se ofrecen no marco desta rede de locais de ensaio. Os internautas que se acheguen a este punto poderán coñecer os locais de ensaio en funcionamento e as vindeiras aperturas, así como os grupos que usan estes espazos. A actualidade ocupará tamén un lugar destacado deste apartado, xunto co espazo Escoita!, un novidoso punto no que se poderán escoitar en liña as cancións dos grupos e que os internautas poderán valorar e votar, ademais de descargar ao seu ordenador. Para poder acceder a este apartado de votación aos grupos e cancións favoritos os internautas deberán rexistrarse previamente. Unha vez feito terán acceso ás votacións, á inserción de comentarios e opinións e á descarga da música.

Cómpre salientar que a web acollerá tamén un servizo de radio coñecido como radionsaio, no que os internautas poderán escoitar a música do portal.

Galiza, potencia cultural

Na súa intervención o director xeral de Xuventude afirmou que hoxe por hoxe Galiza é "unha auténtica potencia cultural" e explicou que coa posta en marcha do proxecto Nsaio trátase de abrir unha nova etapa de relación entre o Goberno galego e os novos talentos do país. Así, lembrou que a Rede Galega de Locais de Ensaio é hoxe en día un referente a nivel do Estado, xa que se trata do único espazo do país de carácter público e gratuíto acondicionado de xeito profesional e no que os artistas teñen libre acceso. "Pero Nsaio é moito máis", apuntou Rubén Cela, xa que se trata dunha iniciativa transversal en plena sintonía cos concellos do país e cos grupos e solistas que participan no proxecto.

Pola súa banda, o director xeral de Creación e Difusión Cultural salientou o carácter pioneiro e vangardista desta iniciativa, coa que o Goberno galego dá resposta a unha gran necesidade que había no país no eido musical. Neste punto, avanzou que un dos vindeiros obxectivos do programa é facer que os novos talentos do programa Nsaio teñan acceso aos circuítos culturais do país e que a súa creación acade difusión e presenza pública. Así, apuntou a modo de exemplo as posibilidades que ofrece a Rede Galega de Música ao Vivo como punto de difusión da creatividade galega ao longo de toda a xeografía do país. De feito, un total de 47 salas de programación do país participan nesta iniciativa, que ao longo do 2008 ten programadosarredor de 600 concertos de máis de 80 grupos musicais noveis de Galiza. Ademais, apuntou tamén aos festivais como un importante espazo no que os novos creadores poidan a dar a coñecer o seu traballo ao lado de outros grupos ou solistas xa consolidados. "Vivimos un gran momento para a música galega que dará grandes froitos nos vindeiros anos", manifestou Luís Bará ao peche das súas palabras.